ഭോപ്പാല്‍ : മധ്യപ്രദേശിലെ മുന്‍ കോണ്‍ഗ്രസ് മന്ത്രിയും നാല് തവണ കോണ്‍ഗ്രസില്‍ നിന്ന് നിയമസഭ സമാജികനുമായ ചിന്ദ്വാര ദീപക് സക്‌സേനയും അനുയായികളും ബിജെപിയില്‍ ചേര്‍ന്നു. മധ്യപ്രദേശ് മുഖ്യമന്ത്രി മോഹന്‍ യാദവ് സക്‌സേനയെ ബിജെപിയിലേക്ക് സ്വാഗതം ചെയ്‌തു. കമല്‍ നാഥിന്‍റെ വലം കൈയാണ് സക്‌സേന.
കഴിഞ്ഞ മാസം 22ന് സക്‌സേന കോണ്‍ഗ്രസില്‍ നിന്ന് രാജി വച്ചിരുന്നു. പ്രധാനമന്ത്രി നരേന്ദ്ര മോദി. ആഭ്യന്തരമന്ത്രി അമിത് ഷാ, മുഖ്യമന്ത്രി യാദവ്, ബിജെപി സംസ്ഥാന അധ്യക്ഷന്‍ വി ഡി ശര്‍മ്മ എന്നിവരുടെ പ്രവര്‍ത്തനങ്ങള്‍ തന്നെ സ്വാധീനിച്ചതിനാല്‍ ബിജെപിയിലേക്ക് പോകുന്നുവെന്ന് പറഞ്ഞായിരുന്നു സക്‌സേന കോണ്‍ഗ്രസ് വിട്ടത്. നേരത്തെ ഇദ്ദേഹത്തിന്‍റെ മകന്‍ അജയ് സക്‌സേനയും ബിജെപിയില്‍ ചേര്‍ന്നിരുന്നു.
ചിന്ദ്വാരയിലെ സിറ്റിങ് എംപി കമല്‍ നാഥിന്‍റെ മകന്‍ നകുല്‍ നാഥിന്‍റെ നേതൃത്വത്തില്‍ കോണ്‍ഗ്രസിന് ലക്ഷ്യബോധം ഇല്ലാതായിരിക്കുന്നു. തന്‍റെ പിതാവിനെ മാറ്റി നിര്‍ത്തിയിരിക്കുന്നു. കഴിഞ്ഞ ആറ് വര്‍ഷമായി പ്രവര്‍ത്തകരെയും അവഗണിക്കുകയാണ്. അത് കൊണ്ടാണ് അദ്ദേഹം കോണ്‍ഗ്രസ് വിടാന്‍ തീരുമാനിച്ചതെന്നും അജയ് സക്‌സേന പറഞ്ഞു.
2018ല്‍ കമല്‍ നാഥ് മുഖ്യമന്ത്രിയായപ്പോള്‍ അദ്ദേഹത്തിന് വേണ്ടി ദീപക് സക്‌സേന തന്‍റെ മണ്ഡലം ഒഴിഞ്ഞ് കൊടുത്തിരുന്നു. കഴിഞ്ഞ മാസം 29ന് അമര്‍വാര എംഎല്‍എയും കമല്‍ നാഥിന്‍റെ വിശ്വസ്‌തനുമായിരുന്ന കമലേഷ് പ്രതാപ് ഷാ ബിജെപിയിലേക്ക് ചേക്കേറിയിരുന്നു. അമര്‍വാര സീറ്റില്‍ നിന്ന് മൂന്ന് തവണ വിജയിച്ച ആളാണ് കമലേഷ്.
Also Read: ബോക്‌സിങ് താരം വിജേന്ദർ സിങ് കോൺഗ്രസ് വിട്ട് ബിജെപിയില്‍ ചേർന്നു - Boxer Vijender Singh Joined BJP
2023 നവംബറില്‍ നടന്ന മധ്യപ്രദേശ് നിയമസഭ തെരഞ്ഞെടുപ്പില്‍ ചിന്ദ്വാര ജില്ലയിലെ ഏഴ് നിയമസഭ സീറ്റുകളും കോണ്‍ഗ്രസ് നേടിയിരുന്നു. ചിന്ദ്വാരയില്‍ പിടിമുറുക്കാനുള്ള എല്ലാ അടവുകളും പയറ്റുകയാണ് ബിജെപി. ഇത് മാത്രമാണ് 2019 ലോക്‌സഭ തെരഞ്ഞെടുപ്പില്‍ മധ്യപ്രദേശില്‍ കോണ്‍ഗ്രസിന് ജയിക്കാനായ ഏക മണ്ഡലം. സിറ്റിങ് എംപി നകുല്‍ നാഥ് തന്നെയാണ് ഇക്കുറിയും ഇവിടെ നിന്ന് ജനവിധി തേടുന്നത്. ബിജെപിയുടെ വിവേക് സാഹുവാണ് എതിരാളി. ഈമാസം 19നാണ് മധ്യപ്രദേശില്‍ പോളിങ്.
