പ്രയാഗ്‌രാജ് : സംരക്ഷണം ആവശ്യപ്പെട്ട് മിശ്രവിവാഹിതര്‍ നല്‍കിയ ഹര്‍ജി തള്ളി ഹൈക്കോടതി. അലഹബാദ് ഹൈക്കോടതിയാണ് ഇത്തരമൊരു സമീപനം കൈക്കൊണ്ടത്. ഉത്തര്‍പ്രദേശ് സര്‍ക്കാരിന്‍റെ മതംമാറ്റ നിയമ നിരോധനത്തിന് എതിരാണ് നടപടിയെന്ന് ചൂണ്ടിക്കാട്ടിയാണ് കോടതി ഉത്തരവ്.
മൊറാദാബാദ് അടക്കമുള്ള മറ്റുജില്ലകളില്‍ നിന്ന് സമര്‍പ്പിച്ച സമാനമായ വിവിധ ഹര്‍ജികളും ജസ്റ്റിസ് സരള്‍ ശ്രീവാസ്‌തവ തള്ളി. ജീവന് ഭീഷണി ഉണ്ടെന്നും തങ്ങളുടെ രക്ഷിതാക്കള്‍ വൈവാഹിക ജീവിതത്തില്‍ ഇടപെടരുതെന്നും ആവശ്യപ്പെട്ടാണ് ദമ്പതിമാര്‍ കോടതിയെ സമീപിച്ചത്. വ്യത്യസ്‌ത മതങ്ങളില്‍ പെട്ടവരുടെ വിവാഹം സംബന്ധിച്ച കേസാണ് ഇതെന്നും വിവാഹത്തിന് മുമ്പ് ദമ്പതികളിലാരും നിയമം അനുസരിച്ചിട്ടില്ലെന്നും കോടതി ചൂണ്ടിക്കാട്ടി.
അതുകൊണ്ട് തന്നെ വിവാഹത്തിന് നിയമസാധുതയില്ലെന്നും കോടതി വ്യക്തമാക്കി. അതേസമയം ദമ്പതിമാര്‍ക്ക് നിയമം അനുശാസിക്കുന്ന നടപടിക്രമങ്ങളിലൂടെ ഒരു പ്രാവശ്യം കൂടി വിവാഹിതരാകാവുന്നതാണെന്നും കോടതി പറഞ്ഞു.
2021ലാണ് ഉത്തര്‍പ്രദേശ് സര്‍ക്കാര്‍ മതപരിവര്‍ത്തന നിരോധന നിയമം പാസാക്കിയത്. അനധികൃത മതം മാറ്റം തടയുക എന്ന ലക്ഷ്യത്തോടെയായിരുന്നു നടപടി. ബലം പ്രയോഗിച്ചോ സ്വാധീനം ചെലുത്തിയോ ഉള്ള മതം മാറ്റം തടയുക എന്ന ലക്ഷ്യത്തോടെയാണ് ഇത്തരമൊരു നിയമം കൊണ്ടുവന്നത്.
എട്ട് ദമ്പതിമാരാണ് സംരക്ഷണം ആവശ്യപ്പെട്ട് കോടതിയെ സമീപിച്ചത്. ഇതില്‍ അഞ്ച് മുസ്‌ലിം യുവാക്കള്‍ ഹിന്ദു സ്‌ത്രീകളെയും മൂന്ന് ഹിന്ദു യുവാക്കള്‍ മുസ്‌ലിം സ്‌ത്രീകളെയുമാണ് വിവാഹം കഴിച്ചത്.
ഉത്തര്‍പ്രദേശ്, മധ്യപ്രദേശ്, ഗുജറാത്ത്, ഉത്തരാഖണ്ഡ്, ഹിമാചല്‍ പ്രദേശ് സംസ്ഥാനങ്ങളിലെ മതപരിവര്‍ത്തന നിരോധന നിയമത്തെ ചോദ്യം ചെയ്തുകൊണ്ടുള്ള ഹര്‍ജികള്‍ സുപ്രീം കോടതിയുടെ പരിഗണനയിലാണ്.
Also Read: മുസ്ലീം സമുദായത്തിൽപ്പെട്ടവരെ ചാട്ടവാറിനടിച്ച്‌ പൊലീസ്‌; ശാസിച്ച്‌ സുപ്രീം കോടതി
കഴിഞ്ഞ ദിവസമാണ് മതവുമായി ബന്ധപ്പെട്ട ഒരു നിര്‍ണായക പരാമര്‍ശം സുപ്രീം കോടതിയില്‍ നിന്നുണ്ടായതെന്നതും ഈ വിധിയോട് ചേര്‍ത്ത് വായിക്കേണ്ടതാണ്. ഹര്‍ജികളില്‍ കക്ഷികളുടെ ജാതിയും മതവും പരാമർശിച്ചതിൽ ആശ്ചര്യം പ്രകടിപ്പിക്കുകയായിരുന്നു സുപ്രീം കോടതി. സുപ്രീം കോടതിയിലോ മറ്റ് കീഴ്‌ കോടതികളിലോ ഇത്തരം പരാമര്‍ശങ്ങളുടെ ആവശ്യകതയില്ലെന്നും കോടതി ചൂണ്ടിക്കാട്ടി.
സുപ്രീം കോടതിയിലോ കീഴ്‌ കോടതികളിലോ കക്ഷികളുടെ ജാതി/മതം പരാമർശിക്കുന്നതിനുള്ള ഒരാവശ്യകതയും കാണുന്നില്ലെന്നും അത്തരമൊരു നടപടി ഉടനടി അവസാനിപ്പിക്കേണ്ടതാണെന്നും ജസ്റ്റിസുമാരായ ഹിമ കോഹ്‌ലിയും അഹ്‌സാനുദ്ദീൻ അമാനുല്ലയും അടങ്ങുന്ന ബെഞ്ച് പറഞ്ഞു.
അതിനാൽ കോടതിക്ക് മുമ്പാകെ സമർപ്പിച്ച ഹർജികളില്‍ കക്ഷികളുടെ മെമ്മോയിൽ ഇനി മുതൽ ജാതിയോ മതമോ പരാമർശിക്കരുതെന്ന് നിർദ്ദേശിച്ചുകൊണ്ടുള്ള ഒരു പൊതു ഉത്തരവ് പുറപ്പെടുവിക്കുന്നത് ഉചിതമാണെന്ന് കരുതുന്നതായും ബെഞ്ച് പറഞ്ഞു.
അതത് അധികാരപരിധിയിലുള്ള ഹൈക്കോടതിയിലോ കീഴ്‌ക്കോടതികളിലോ സമർപ്പിക്കുന്ന ഏതെങ്കിലും ഹർജികളിലോ നടപടികളിലോ കക്ഷികളുടെ മെമ്മോയിൽ ജാതി/മതം വരുന്നില്ലെന്ന് ഉറപ്പാക്കാൻ എല്ലാ ഹൈക്കോടതികൾക്കും നിർദേശം നൽകിയിട്ടുണ്ടെന്നും ബെഞ്ച് പറഞ്ഞു.
'മേൽപ്പറഞ്ഞ നിർദ്ദേശങ്ങൾ ഉടനടി പാലിക്കുന്നതിനായി ബാറിലെ അംഗങ്ങളുടെയും രജിസ്ട്രിയുടെയും ശ്രദ്ധയിൽപ്പെടുത്തും. ഉത്തരവിന്‍റെ പകർപ്പ് ബന്ധപ്പെട്ട രജിസ്ട്രാർ മുമ്പാകെ പരിശോധിക്കുന്നതിനും എല്ലാ ഉന്നതരുടെയും രജിസ്ട്രാർ ജനറലുകൾക്ക് വിതരണം ചെയ്യുന്നതിനും സമർപ്പിക്കും. കോടതികൾ കർശനമായി പാലിക്കണമെന്നും ബെഞ്ച് വ്യക്തമാക്കി'.
രാജസ്ഥാനിൽ നിന്നുള്ള ട്രാൻസ്‌ഫർ ഹർജി പരിഗണിച്ച് ജനുവരി 10 നാണ് സുപ്രീം കോടതി ഉത്തരവ് പുറപ്പെടുവിച്ചത്. പാർട്ടികളുടെ മെമ്മോയിൽ ഇരു പാർട്ടികളുടെയും ജാതിയും മറ്റ് വിശദാംശങ്ങളും പരാമർശിച്ചതിലാണ്‌ ബെഞ്ച് എതിര്‍പ്പ്‌ പ്രകടമാക്കിയത്‌.
കക്ഷികളുടെ മെമ്മോ ഏതെങ്കിലും വിധത്തിൽ മാറ്റുകയാണെങ്കിൽ, സുപ്രീം കോടതി രജിസ്ട്രി എതിർപ്പ് ഉന്നയിക്കുമെന്ന് വനിതാ ഹര്‍ജിക്കാര്‍ക്ക്‌ വേണ്ടി ഹാജരായ അഭിഭാഷകൻ വാദിച്ചു. രണ്ട് കക്ഷികളുടെയും ജാതി ചുവടെയുള്ള കോടതിയിൽ പരാമർശിച്ചതിനാൽ, ട്രാൻസ്‌ഫർ ഹർജിയിൽ അവരുടെ ജാതി പരാമർശിക്കുകയല്ലാതെ മറ്റൊരു മാർഗവുമില്ലെന്ന് അഭിഭാഷകൻ പറഞ്ഞു.
