സൊമാലിയൻ കടൽക്കൊള്ളക്കാർ റാഞ്ചിയ ഇറാനിയൻ കപ്പൽ മോചിപ്പിച്ച് ഇന്ത്യൻ നാവികസേന

ഇന്ത്യൻ നാവികസേനയുടെ യുദ്ധക്കപ്പലായ ഐഎൻഎസ് സുമിത്ര ഉപയോഗിച്ചുള്ള ദൗത്യമാണ് മത്സ്യബന്ധന കപ്പലിനെ മോചിപ്പിച്ചത്. സൊമാലിയയുടെ കിഴക്കൻ തീരത്തും ഏദൻ ഉൾക്കടലിലും കടൽക്കൊള്ള വിരുദ്ധ പ്രവർത്തനങ്ങളിൽ ഏർപ്പെട്ടിരിക്കുന്ന സേനയുടെ യുദ്ധക്കപ്പലാണിത്

സൊമാലിയൻ കടൽക്കൊള്ളക്കാർ തട്ടിയെടുത്ത ഇറാനിയൻ കപ്പലായ 'ഇമാനെ' മോചിപ്പിച്ച് ഇന്ത്യൻ നാവികസേന. ഇന്ത്യൻ നാവികസേനയുടെ യുദ്ധക്കപ്പലായ ഐഎൻഎസ് സുമിത്ര ഉപയോഗിച്ചുള്ള ദൗത്യമാണ് ഇറാൻ്റെ പതാകയുള്ള മത്സ്യബന്ധന കപ്പൽ (എഫ്‌വി) ഇമാനെ സുരക്ഷിതമായി രക്ഷപ്പെടുത്തിയത്. കപ്പലിലെ ജീവനക്കാരെയും മോചിപ്പിച്ചതായി നാവികസേന അറിയിച്ചു (Indian Navy warship INS Sumitra rescued Iranian vessel Iman from Somali pirates).

17 ജീവനക്കാരാണ് കപ്പലിൽ ഉണ്ടായിരുന്നത്. അറബിക്കടലിൽ കൊച്ചി തീരത്തിന് 700 നോട്ടിക്കൽ മൈൽ അകലെ നിന്നാണ് ഇറാനിയൻ മത്സ്യബന്ധന കപ്പൽ കടൽക്കൊള്ളക്കാർ റാഞ്ചിയത്. പിന്നാലെ ഇമാൻ്റെ സഹായ അഭ്യർഥന, സൊമാലിയയുടെ കിഴക്കൻ തീരത്തും ഏദൻ ഉൾക്കടലിലും കടൽക്കൊള്ള വിരുദ്ധ പ്രവർത്തനങ്ങളിൽ ഏർപ്പെട്ടിരിക്കുന്ന ഐഎൻഎസ് സുമിത്രയ്‌ക്ക് ലഭിക്കുകയായിരുന്നു.

തുടർന്ന് ഐഎൻഎസ് സുമിത്രയിലെ ധ്രൂവ് ഹെലികോപ്‌ടർ ഉപയോഗിച്ചുകൊണ്ട് കപ്പലുകള്‍ വിട്ടുനൽകണമെന്ന് സൂചന നൽകിയതായി പ്രതിരോധ ഉദ്യോഗസ്ഥർ പറഞ്ഞു. എന്നാൽ കൊള്ളക്കാർ ഇതിന് തയ്യാറാകാതായതോടെ ഇന്ത്യൻ നാവികസേന കപ്പൽ വളയുകയും കൊള്ളക്കാരെ നിരായുധീകരിക്കുകയുടെ ചെയ്‌തു. തുടർന്നാണ് സേന രക്ഷാദൗത്യം ആരംഭിച്ചത്. തുടർന്നുള്ള ഗതാഗതത്തിനായി മത്സ്യബന്ധന ബോട്ട് വിട്ടയക്കുകയും ചെയ്‌തതായി നാവികസേന അറിയിച്ചു.

നേരത്തെ ഇറാനിയൻ പതാകയുള്ള മത്സ്യബന്ധന കപ്പൽ ഹൈജാക്ക് ചെയ്‌തതുമായി ബന്ധപ്പെട്ട് നാവിക സേന വക്‌താവ് എക്‌സിൽ പോസ്റ്റ് ചെയ്‌തിരുന്നു. ജീവനക്കാരെ ബന്ദികളാക്കിയിരിക്കുന്നതായും പോസ്റ്റിൽ പറഞ്ഞിരുന്നു. അതേസമയം കടൽക്കൊള്ളക്കാരെ നിരായുധരാക്കിയെന്നും ഇവരോട് സോമാലിയയിലേക്ക് നീങ്ങാൻ ആവശ്യപ്പെട്ടിട്ടുണ്ടെന്നും അധികൃതർ അറിയിച്ചു.

ചെങ്കടലിലും അറബിക്കടലിൻ്റെ ചില ഭാഗങ്ങളിലും കൊള്ളക്കാർ ആക്രമണം നടത്തുന്ന പശ്ചാത്തലത്തിൽ ഇന്ത്യൻ നാവികസേന പ്രശ്‌ന ബാധിത മേഖലയിൽ നിരീക്ഷണം ശക്തമാക്കിയിട്ടുണ്ട്. ഏതാണ്ട് 10 യുദ്ധക്കപ്പലുകൾ അടങ്ങുന്ന ടാസ്‌ക് ഗ്രൂപ്പുകളെ ഇവിടങ്ങളിൽ വിന്യസിച്ചതായാണ് വിവരം.

നേരത്തെ, ഈ വർഷം ജനുവരി 17 ന് രാത്രി നടന്ന ഡ്രോൺ ആക്രമണത്തെ തുടർന്ന് ജനുവരി 18 ന് ഇന്ത്യൻ നാവികസേനയുടെ ഗൈഡഡ് മിസൈൽ ഡിസ്‌ട്രോയർ ഐഎൻഎസ് വിശാഖപട്ടണത്തിന്, മാർഷൽ ദ്വീപിൻ്റെ പതാകയുള്ള എംവി ജെൻകോ പിക്കാർഡിയിൽ നിന്ന് ഒരു അപകട സന്ദേശം ലഭിച്ചിരുന്നു. നിലവിൽ ഏദൻ ഉൾക്കടലിൽ കടൽക്കൊള്ള വിരുദ്ധ ദൗത്യത്തിൽ ഏർപ്പെട്ടിരിക്കുന്ന ഐഎൻഎസ് വിശാഖപട്ടണം, ഉടൻ തന്നെ നടപടികളിലേക്ക് നീങ്ങുകയും അടിയന്തര സഹായം നൽകുന്നതിനായി ജനുവരി 18 ന് അർദ്ധരാത്രി തന്നെ കപ്പലുകളെ തടയുകയും ചെയ്‌തിരുന്നു.