ഹൈദരാബാദ്: വ്യാജ ഓട്ടിസം തെറാപ്പി കേന്ദ്രങ്ങൾ ഹൈദരാബാദിൽ കൂടി വരുന്നതായി പരാതി. ലൈസൻസില്ലാത്തതും രജിസ്റ്റർ ചെയ്യാത്തതുമായ സെൻ്ററുകളാണ് കൂടി വരുന്നത്. അനധികൃതമായി പ്രവർത്തിക്കുന്ന ഈ ക്ലിനിക്കുകൾ ഓരോ സെഷനിലും രക്ഷിതാക്കളിൽ നിന്ന് ₹1,500 രൂപ വരെ ഈടാക്കുന്നുണ്ട്. യോഗ്യത തെളിയിക്കുന്ന സർട്ടിഫിക്കറ്റോ വിദഗ്‌ധ മേൽനോട്ടമോ ഇല്ലാതെ തെറാപ്പി ചികിത്സകൾ നൽകുന്നുവെന്ന് ആരോപിക്കപ്പെടുന്നുണ്ട്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
സാമൂഹിക ഇടപെടൽ, ആശയവിനിമയം, പെരുമാറ്റം എന്നിവയെ ബാധിക്കുന്ന ഒരു ന്യൂറോ ഡെവലപ്‌മെൻ്റൽ ഡിസോർഡറായ ഓട്ടിസം പലപ്പോഴും കുട്ടികളിൽ മൂന്ന് വയസ് മുതലാണ് പ്രകടമാകുന്നത്. നേരത്തെയുള്ള രോഗനിർണയം മൂലം ഓട്ടിസം ലക്ഷണങ്ങളെ 80% വരെ ലഘൂകരിക്കാൻ കഴിയും. കുക്കട്ട്പള്ളി, സുചിത്ര, ബീഗംപേട്ട്, ദിൽഷുഖ് നഗർ, ഉപ്പൽ, സെക്കന്തരാബാദ്, അമീർപേട്ട് തുടങ്ങിയ സ്ഥലങ്ങളിലാണ് ഇത്തരം വ്യാജ കേന്ദ്രങ്ങളെക്കുറിച്ച് പരാതി ഉയർന്നിരിക്കുന്നത്.
വിദഗ്‌ധ മേൽനോട്ടത്തിൻ്റെയും നിയന്ത്രണത്തിൻ്റെയും അഭാവം
റൈറ്റ്സ് ഓഫ് പേഴ്‌സൺസ് വിത്ത് ഡിസബിലിറ്റിസ് (RPWD) നിയമപ്രകാരം ഓട്ടിസം തെറാപ്പി സെൻ്ററുകൾ രജിസ്റ്റർ ചെയ്യുകയും യോഗ്യരായിട്ടുള്ള മെഡിക്കൽ പ്രൊഫഷണലിൻ്റെ കീഴിൽ മാത്രമേ ചികിത്സ സ്വീകരിക്കുവാനും പാടുള്ളൂ. ഞെട്ടിപ്പിക്കുന്ന മറ്റൊരു കാര്യം എന്തെന്നാൽ ഇത്തരം കേന്ദ്രങ്ങളിൽ പ്ലസ്‌ടു അല്ലെങ്കിൽ ഡിഗ്രി യോഗ്യതയുള്ളവരെ മെഡിക്കൽ പ്രൊഫഷണലായി നിയമിക്കുന്നു. ഇവരെ തെറാപ്പിസ്റ്റുകളായി നിയമനം നൽകുന്നതിന് മുൻപ് ചെറിയ രീതിയിൽ പരിശീലനവും നൽകുന്നു.
ഇത്തരം കേന്ദ്രങ്ങൾ ഒരു സ്ഥലത്ത് രജിസ്റ്റർ ചെയ്യുകയും അനുമതിയില്ലാതെ മറ്റൊരിടത്ത് അനധികൃതമായി ശാഖകൾ പ്രവർത്തിപ്പിക്കുകയും ചെയ്യുന്ന സംഭവങ്ങൾ വ്യാപകമാണ്. 4 - 5 പ്രതിവാര സെഷനുകൾക്ക് 1,000 രൂപയുടെ പാക്കേജുകളാണ് വാഗ്‌ദാനം ചെയ്യുന്നത്.
ഓട്ടിസത്തിൻ്റെ പ്രാരംഭ ലക്ഷണങ്ങൾ
- സാമൂഹികമായി ഇടപെടുന്നതിനും ആശയവിനിമയം നടത്തുന്നതിനുമുള്ള ബുദ്ധിമുട്ട്.
- വാക്കുകൾ അല്ലെങ്കിൽ ശൈലികൾ മനസ്സിലാക്കാതെ ആവർത്തിച്ച് പറഞ്ഞ് കൊണ്ടിരിക്കുക.
- നിർദേശങ്ങൾ മനസിലാക്കാനോ പ്രതികരിക്കാനോ കഴിയാതിരിക്കുക.
- ഹൈപ്പർ ആക്‌ടിവിറ്റി അല്ലെങ്കിൽ ശ്രദ്ധ കേന്ദ്രീകരിക്കാൻ കഴിയാതിരിക്കുക.
- ഡിജിറ്റൽ ഉപകരണങ്ങളെ ആശ്രയിക്കുക.
ഇത്തരത്തിലുള്ള ലക്ഷണങ്ങൾ ശ്രദ്ധയിൽപ്പെട്ടാൽ മാതാപിതാക്കൾ ഉടൻ തന്നെ സ്പെഷ്യലിസ്റ്റുകളെ സമീപിക്കുക. ഇങ്ങനെ ചെയ്യുന്നതിലൂടെ ഒരു പരിധി വരെ കുട്ടിയുടെ വളർച്ചയും ജീവിത നിലവാരവും ഗണ്യമായി മെച്ചപ്പെടുത്താനാകും.
സർക്കാർ ഇടപെടലിന് ആഹ്വാനം
വർധിച്ച് വരുന്ന ഈ പ്രശ്‌നം പരിഹരിക്കുന്നതിനായി സർക്കാർ ഇടപെടണമെന്നാണ് ഓട്ടിസം തെറാപ്പിസ്റ്റ് ഡോ. കരുണ സർക്കാരിനോട് അഭ്യർഥിക്കുന്നത്.
- കർശനമായ നിയന്ത്രണങ്ങളും ഓട്ടിസം തെറാപ്പി സെൻ്ററുകളുടെ രജിസ്ട്രേഷനും നടപ്പിലാക്കുക.
- ചികിത്സ തേടുന്ന രക്ഷിതാക്കൾക്കായി ഹെൽപ്പ് ലൈനുകൾ സ്ഥാപിക്കുകയും വ്യക്തമായ മാർഗനിർദേശങ്ങൾ നൽകുകയും ചെയ്യുക.
- ഓട്ടിസത്തെക്കുറിച്ചും വ്യാജ തെറാപ്പി ക്ലിനിക്കുകളുടെ അപകടസാധ്യതകളെക്കുറിച്ചും കുടുംബങ്ങളെ ബോധവത്‌കരിക്കാൻ ക്യാമ്പെയ്‌നുകൾ ആരംഭിക്കുക.
രക്ഷിതാക്കൾക്ക് ജാഗ്രതാ നിർദേശം
തെറാപ്പി സെൻ്ററുകളുടെ വിശ്വാസ്യത പരിശോധിക്കാനും പരിശീലനം ലഭിച്ച മെഡിക്കൽ പ്രൊഫഷണലിൻ്റെയടുത്ത് മാത്രം ചികിത്സ തേടാൻ രക്ഷിതാക്കളോട് നിർദേശിക്കുകയും ചെയ്യുന്നു. ഇത് ചൂഷണം തടയുന്നതിനും കുട്ടികൾക്ക് സുരക്ഷിതമായ ചികിത്സ ഉറപ്പാക്കാനും സഹായിക്കുന്നു.
Also Read: രണ്ടര വര്‍ഷമായി വീട്ടുകാരെ ഭീതിപ്പെടുത്തുന്ന ഭീമന്‍ മൂര്‍ഖന്‍; ഒടുവില്‍ വനംവകുപ്പിന്‍റെ 'കെണിയില്‍'
