ന്യൂഡല്‍ഹി: ഝാര്‍ഖണ്ഡ് മുന്‍ മുഖ്യമന്ത്രി ഹേമന്ത് സോറന്‍റെ ഭാര്യ കല്‍പ്പന സോറന്‍, ഡല്‍ഹി മുഖ്യമന്ത്രി അരവിന്ദ് കെജ്‌രിവാളിന്‍റെ വീട്ടിലെത്തി സുനിത കെജ്‌രിവാളുമായി കൂടിക്കാഴ്‌ച നടത്തി. ഇരുവരുടെയും കൂടിക്കാഴ്‌ച ഇരുപത് മിനിറ്റോളം നീണ്ടു.
ഝാര്‍ഖണ്ഡിലെ ഭൂമി അഴിമതിയുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസില്‍ ജനുവരിയില്‍ എന്‍ഫോഴ്‌സ്മെന്‍റ് ഡയറക്‌ടറേറ്റ് അറസ്‌റ്റ് ചെയ്‌ത സോറന്‍ ജയിലിലാണ്. നാളെ ഡല്‍ഹിയില്‍ നടക്കുന്ന ഇന്ത്യാ സഖ്യറാലിയില്‍ പങ്കെടുക്കാനാണ് കവിത സോറന്‍ ഡല്‍ഹിയിലെത്തിയിരിക്കുന്നത്. ഝാര്‍ഖണ്ഡ് മുഖ്യമന്ത്രി ചംപായ് സോറനും നാളെ റാലിയില്‍ പങ്കെടുക്കുന്നുണ്ട്. കെജ്‌രിവാളിന്‍റെ അറസ്‌റ്റിന് ശേഷമാണ് റാലി നിശ്ചയിച്ചത്.
സുനിത കെജ്‌രിവാളും നാളെ നടക്കുന്ന റാലിയില്‍ പങ്കെടുക്കുമെന്നാണ് സൂചന. ഈമാസം 21നാണ് അരവിന്ദ് കെജ്‌രിവാളിനെ ഇഡി അറസ്‌റ്റ് ചെയ്‌തത്. ഡല്‍ഹി മദ്യനയക്കേസിലെ കള്ളപ്പണം വെളുപ്പിക്കലുമായി ബന്ധപ്പെട്ടായിരുന്നു അറസ്‌റ്റ്.
