ഗുരുഗ്രാം (ന്യൂഡല്‍ഹി): പാഴ്‌സലിൽ മയക്കുമരുന്ന് കണ്ടെത്തിയെന്ന് ആരോപിച്ച്‌ തട്ടിപ്പ്‌. കോടിയിലധികം രൂപ തട്ടിയെടുത്തതായി പൊലീസ്. അയച്ച പാഴ്‌സലിൽ മയക്കുമരുന്ന് കണ്ടെത്തിയെന്ന് പറഞ്ഞാണ്‌ കോടിയിലധികം രൂപ തട്ടിയെടുത്തത്‌. സെക്‌ടർ 83 ൽ താമസിക്കുന്ന ആശിഷ് സരിൻ എന്നയാളുടെ കയ്യില്‍ നിന്നാണ്‌ പണം തട്ടിയത്‌.
സൈബർ ക്രൈം സൗത്ത് പൊലീസ് സ്റ്റേഷനിൽ നൽകിയ പരാതി പ്രകാരം, കൊറിയർ കമ്പനി എക്‌സിക്യൂട്ടീവാണെന്ന് അവകാശപ്പെട്ട് ഒരാൾ വിളിച്ച്, അയച്ച പാക്കേജിൽ മയക്കുമരുന്ന് കണ്ടെത്തിയതായി അറിയിച്ചു. തുടര്‍ന്ന്‌ മുംബൈ ക്രൈംബ്രാഞ്ച് ഇൻസ്പെക്‌ടർ എന്ന് സ്വയം പരിചയപ്പെടുത്തിയ മറ്റൊരാളും വിളിച്ച് മുംബൈയിലേക്ക് വരാൻ ആവശ്യപ്പെടുകയും അറസ്റ്റ് ചെയ്യുമെന്ന് ഭീഷണിപ്പെടുത്തുകയും ചെയ്‌തു.
താൻ പാഴ്‌സലൊന്നും അയച്ചിട്ടില്ലെന്ന് വിളിച്ചയാളോട് പറഞ്ഞപ്പോൾ, ആരെങ്കിലും ഐഡി ദുരുപയോഗം ചെയ്‌തതാകാമെന്ന്‌ പറയുകയും ജാമ്യത്തിനായി അഭിഭാഷകനെ ഏർപ്പാടാക്കാൻ ആവശ്യപ്പെടുകയും ചെയ്‌തു. പിന്നീട് 1.28 കോടി രൂപ ഓൺലൈനായി കൈമാറാൻ നിർബന്ധിക്കുകയും ചെയ്‌തുവെന്ന് പൊലീസ് പറഞ്ഞു.
പ്രതികൾ വീണ്ടും പണം ആവശ്യപ്പെട്ടതിനെ തുടർന്നാണ് സരിൻ പൊലീസിനെ സമീപിച്ചത്. പരാതിയുടെ അടിസ്ഥാനത്തിൽ അജ്ഞാതർക്കെതിരെ ഇന്ത്യൻ ശിക്ഷാ നിയമത്തിലെയും ഐടി നിയമത്തിലെയും പ്രസക്തമായ വകുപ്പുകൾ പ്രകാരം കേസെടുത്തതായി പൊലീസ് അറിയിച്ചു.
