ഗുവാഹത്തി: അസമില്‍ 4 നിയമസഭ മണ്ഡലങ്ങളിലേക്ക് ഉപതെരഞ്ഞെടുപ്പ് നടക്കാനിരിക്കെ ബിജെപി ബീഫ് പാര്‍ട്ടി സംഘടിപ്പിച്ചെന്ന ആരോപണം ചര്‍ച്ചയാകുന്നു. നവംബര്‍ 13 ന് ഉപതെരഞ്ഞെടുപ്പ് നടക്കാനിരിക്കെ മുസ്ലിം വോട്ടര്‍മാരെ ആകര്‍ഷിക്കാൻ ബിജെപി ബീഫ് പാര്‍ട്ടി സംഘടിപ്പിച്ചതെന്ന ധുബ്രിയിൽ നിന്നുള്ള ലോക്‌സഭാ എംപി റാക്കിബുൾ ഹുസൈന്‍റെ ആരോപണമാണ് പുതിയ വിവാദങ്ങള്‍ക്ക് വഴിവച്ചത്. ബീഫ് നിരോധിക്കുമെന്ന് പറഞ്ഞ ബിജെപി സര്‍ക്കാരാണ് ഇപ്പോള്‍ അസമിലെ ഒരു പ്രത്യേക സമുദായത്തെ മാത്രം ലക്ഷ്യമിട്ട് ബീഫ് പാര്‍ട്ടി സംഘടിപ്പിച്ചതെന്നും അദ്ദേഹം ആരോപിച്ചിരുന്നു.
തെരഞ്ഞെടുപ്പിന് മുന്നോടിയായി പലയിടത്തും ബീഫ് വിൽപന നിരോധിക്കുകയും നിയന്ത്രിക്കുകയും മറ്റ് പല സംസ്ഥാനങ്ങളിലേക്കും നിരോധനം വ്യാപിപ്പിക്കുമെന്നും ബിജെപി നേരത്തെ വാഗ്‌ദാനം ചെയ്‌തിരുന്നു. ഹിന്ദു വോട്ടര്‍മാരെ സ്വാധീനിക്കാനാണ് ബീഫ് നിരോധനമെന്നും പലരും അഭിപ്രായപ്പെട്ടിരുന്നു. എന്നാല്‍, മുസ്ലിം വോട്ടര്‍മാരെ ആകര്‍ഷിക്കാൻ ബിജെപി ബീഫ് പാര്‍ട്ടി സംഘടിപ്പിച്ചുവെന്ന ആരോപണമാണ് അസം രാഷ്ട്രീയത്തില് നിലവില്‍ വലിയൊരു കോളിളക്കം സൃഷ്‌ടിച്ചത്. കോണ്ഗ്രസ് എംപിയുടെ പരാമര്‍ശം അസമില്‍ പലയിടത്തും കോണ്ഗ്രസ്-ബിജെപി പ്രവര്‍ത്തകര്‍ തമ്മില്‍ ഏറ്റുമുട്ടലിലേക്കും സംഘര്‍ഷത്തിലേക്കും നയിച്ചു.
നാഗോൺ ജില്ലയിലെ സമഗുരി മണ്ഡലത്തിന് കീഴിലുള്ള ടെറോ മൈൽ ഏരിയയിൽ ബിജെപി ബീഫ് പാർട്ടി സംഘടിപ്പിച്ചിട്ടുണ്ടെന്നാണ് ലോക്‌സഭാ എംപിയും കോണ്ഗ്രസ് നേതാവുമായ റാക്കിബുൾ ഹുസൈൻ ആരോപിച്ചത്. ബിജെപിക്ക് മുസ്ലിം വോട്ടുകൾ ആവശ്യമില്ലെന്ന് ആവർത്തിച്ച് പറഞ്ഞിരുന്ന ഹിമന്ത ബിശ്വ ശർമ്മ അടുത്തിടെ മണ്ഡലത്തിലെ മുസ്ലിം വോട്ടർമാരെ തൃപ്‌തിപ്പെടുത്താൻ ബീഫ് പാർട്ടി സംഘടിപ്പിച്ചിരുന്നുവെന്ന് ഹുസൈൻ ഒരു റാലിയിൽ പറഞ്ഞു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ഹിമന്ത ബിശ്വ ശർമ്മയുടെ നേതൃത്വത്തിലുള്ള ബിജെപി സംഘടിപ്പിച്ച പ്രത്യേക സ്ഥലത്ത് ബീഫ് പാർട്ടി നടന്നതായി തെളിയിക്കുന്നതിനുള്ള ദൃശ്യങ്ങൾ തന്‍റെ പക്കലുണ്ട്. ആരോപണങ്ങൾ തെറ്റാണെന്ന് തെളിഞ്ഞാൽ രാഷ്‌ട്രീയ ജീവിതം രാജിവയ്ക്കുമെന്നും ഹുസൈൻ വ്യക്തമാക്കിയിരുന്നു. 'കുട്ടികളെ പ്രസവിക്കുന്ന യന്ത്രങ്ങൾ' എന്നാണ് മുസ്ലിം സ്ത്രീകളെ കുറിച്ച് അസം മുഖ്യമന്ത്രി ഹിമന്ത ബിശ്വ ശർമ്മ പറഞ്ഞിരുന്നത്, എന്നാൽ ഇപ്പോൾ മുസ്ലിം വോട്ടർമാരെ പ്രീതിപ്പെടുത്താൻ ബീഫ് പാർട്ടികൾ സംഘടിപ്പിക്കുന്നുവെന്നും, തന്‍റെ ആരോപണത്തെക്കുറിച്ച് ആര്‍എസ്‌എസ് അന്വേഷിക്കണമെന്നും കോണ്ഗ്രസ് എംപി ആവശ്യപ്പെട്ടു.
സമഗുരി മണ്ഡലത്തിലേക്കുള്ള ഉപതെരഞ്ഞെടുപ്പിൽ ഹുസൈന്‍റെ മകൻ തൻസില കോൺഗ്രസ് ടിക്കറ്റിൽ മത്സരിക്കുന്നുണ്ട്. കഴിഞ്ഞ അഞ്ച് തവണ തുടർച്ചയായി സമഗുരി സീറ്റ് നിലനിർത്തിയ ഹുസൈൻ, ഈ വർഷമാദ്യം ധുബ്രിയിൽ നിന്ന് ലോക്‌സഭയിലേക്ക് തെരഞ്ഞെടുക്കപ്പെട്ടിരുന്നു. ഇതിനുപിന്നാലെ, മകന്‍റെ തെരഞ്ഞെടുപ്പ് പ്രചാരണ റാലിയിലാണ് ഹുസൈൻ ബിജെപിക്കെതിരെ ഗുരുതര ആരോപണങ്ങള്‍ ഉന്നയിച്ചത്.
'ബീഫ് പാര്‍ട്ടി സംഘടിപ്പിച്ചിട്ടില്ല', ആരോപണം നിഷേധിച്ച് ബിജെപി, തെരഞ്ഞെടുപ്പ് കമ്മിഷന് പരാതി
ബിജെപി ബീഫ് പാര്‍ട്ടി നടത്തിയെന്ന കോണ്ഗ്രസ് നേതാവിന്‍റെ ആരോപണം സമഗുരി മണ്ഡലത്തിലെ ബിജെപി സ്ഥാനാർഥി ദിപ്ലു രഞ്ജൻ ശർമ്മ നിഷേധിച്ചു. ഹുസൈൻ അവകാശപ്പെടുന്നത് പോലെ ബിജെപി ബീഫ് പാർട്ടി സംഘടിപ്പിച്ചുവെന്ന് ആരെങ്കിലും തെളിയിച്ചാൽ താൻ രാഷ്ട്രീയം വിടുമെന്നും അദ്ദേഹം പറഞ്ഞു.വർഗീയ പ്രചാരണം നടത്തുകയും ഒരു വിഭാഗം ആളുകളുടെ മതവികാരം വ്രണപ്പെടുത്തുകയും ചെയ്‌തതിന് ഹുസൈനെതിരെ നടപടിയെടുക്കണമെന്ന് ആവശ്യപ്പെട്ട് ബർഹാംപൂരിൽ നിന്നുള്ള ബിജെപി നിയമസഭാംഗം ജിതു ഗോസ്വാമി അസമിലെ മുഖ്യ തെരഞ്ഞെടുപ്പ് ഓഫീസറെ സമീപിച്ചിട്ടുണ്ട്.
ബീഫ് കഴിക്കുന്നതുമായി ബന്ധപ്പെട്ട ഹുസൈന്‍റെ പരാമർശം മേഖലയിൽ സാമുദായിക സംഘർഷം സൃഷ്‌ടിക്കുന്നതിന് കാരണമായെന്ന് ചൂണ്ടിക്കാട്ടി ബിജെപി എംഎല്‍എ തെരഞ്ഞെടുപ്പ് കമ്മിഷന് പരാതി നല്‍കി. വാർത്താ ചാനലുകളിലൂടെയും സോഷ്യൽ മീഡിയയിലൂടെയും ഇത്തരം പരാമർശങ്ങൾ പ്രചരിക്കുന്നത് സമുദായിക സംഘര്‍ഷത്തിന് കാരണമാകുമെന്നും ബിജെപി നേതാവ് വ്യക്തമാക്കി.
തെളിവുകള്‍ പുറത്തുവിടും, പരാമര്‍ശത്തില്‍ ഉറച്ച് നിന്ന് ഹുസൈൻ
ബിജെപി തെരഞ്ഞെടുപ്പ് കമ്മിഷന് പരാതി നല്‍കിയിട്ടും തന്‍റെ പരാമര്‍ശത്തില്‍ നിന്ന് പിന്മാറില്ലെന്ന നിലപാടിലാണ് കോണ്ഗ്രസ് എംപി ഹുസൈൻ. ഒക്‌ടോബർ 23 ന് മണ്ഡലത്തിലെ പതിമൂന്നാം മൈലിൽ നടന്ന ബിജെപി യോഗത്തിൽ ബീഫ് വിളമ്പിയെന്നും ഇത് ബിജെപി അംഗങ്ങൾക്കിടയിൽ തന്നെ സംഘർഷത്തിന് ഇടയാക്കിയെന്നും അദ്ദേഹം അവകാശപ്പെട്ടു. ഗോഹത്യക്കെതിരെ സംസാരിക്കുന്ന ബിജെപി ഒരു തെരഞ്ഞെടുപ്പിൽ വിജയിക്കാനായി ഈ നിലയിലേക്ക് തരംതാഴ്‌ന്നെന്നും അദ്ദേഹം വിമര്‍ശിച്ചു.
ഇതുമായി ബന്ധപ്പെട്ട് തെളിവുകള്‍ പുറത്തുവിടുമെന്ന് പറഞ്ഞ ഹുസൈൻ താൻ ഉന്നയിച്ച അവകാശവാദങ്ങളുമായി ബന്ധപ്പെട്ട് തെരഞ്ഞെടുപ്പ് കമ്മിഷനുമായി സഹകരിക്കാൻ സന്നദ്ധത പ്രകടിപ്പിച്ചു, താൻ പറഞ്ഞതിന്‍റെ സത്യാവസ്ഥ ആർഎസ്എസ് അന്വേഷിക്കണം. താൻ പറഞ്ഞത് തെറ്റാണെന്ന് തെളിയിക്കപ്പെട്ടാൽ എംപി സ്ഥാനം രാജിവയ്‌ക്കുക മാത്രമല്ല രാഷ്ട്രീയം ഉപേക്ഷിക്കുകയും ചെയ്യുമെന്നും അദ്ദേഹം കൂട്ടിച്ചേര്‍ത്തു.
ബിജെപിയുടെ നേതൃത്വത്തിലുള്ള സർക്കാർ 2021-ൽ കന്നുകാലി സംരക്ഷണ ബിൽ 2021 വഴി പശുക്കളുടെ വിൽപന, ഉപഭോഗം, കശാപ്പ് എന്നിവ അസമില്‍ നിരോധിച്ചിരുന്നു. എന്നാല്‍ ഇപ്പോള്‍ വോട്ടർമാരെ ആകർഷിക്കാൻ ബിജെപി ബീഫ് പാർട്ടി സംഘടിപ്പിക്കുന്നു എന്ന ആരോപണത്തിന് അസം രാഷ്ട്രീയത്തില് ഏറെ പ്രസക്തിയുണ്ട്.
Read Also: ബാന്ദ്ര റെയില്‍വേ സ്‌റ്റേഷനില്‍ തിക്കും തിരക്കും; നിരവധിപേർക്ക് പരിക്ക്
