ഡൽഹി: രാമരാജ്യം എന്ന സ്വപ്‌നം സാക്ഷാത്കരിക്കാനുള്ള ശ്രമത്തിലാണ് ഡൽഹിയിലെ ആംആദ്‌മി സർക്കാർ എന്ന് ഡൽഹി ധനമന്ത്രി അതിഷി. നിയമസഭയിൽ അവരുടെ ആദ്യ ബജറ്റ് പ്രസംഗത്തിനിടെയാണ് ഇക്കാര്യം വ്യക്തമാക്കിയത്. 2024-25 വർഷത്തെ ഡൽഹി സർക്കാരിൻ്റെ 76,000 കോടി രൂപയുടെ ബജറ്റ് അവതരിപ്പിക്കുകയായിരുന്നു ധനമന്ത്രി.
'രാമരാജ്യം' എന്ന ആശയം ഡൽഹി മുഖ്യമന്ത്രി അരവിന്ദ് കെജ്‌രിവാളിൻ്റെ പ്രസംഗങ്ങളിൽ നമുക്ക് കാണാം. 'രാമരാജ്യം' എന്ന ആശയത്തെ കുറിച്ച് വാദിക്കുമ്പോഴൊക്കെ അദ്ദേഹം വാചാലനാകാറുണ്ട്. റിപ്പബ്ലിക് ദിന പ്രസംഗത്തിൽ ആംആദ്‌മി സർക്കാർ രാമ രാജ്യത്തിന്‍റെ 10 തത്ത്വങ്ങൾ ഉൾക്കൊള്ളുന്നതായും നല്ല വിദ്യാഭ്യാസം, ആരോഗ്യ സേവനങ്ങൾ, സൗജന്യ വൈദ്യുതി, വെള്ളം എന്നിവ ജനങ്ങൾക്ക് നൽകുകയും സ്ത്രീ സുരക്ഷ ഉറപ്പാക്കുകയും ചെയ്യുന്നുവെന്നുവെന്നും അദ്ദേഹം വ്യക്തമാക്കിയിരുന്നു.
2025 സാമ്പത്തിക വർഷത്തേക്ക് 16,396 കോടി രൂപയാണ് വിദ്യാഭ്യാസത്തിനായി സർക്കാർ വകയിരുത്തിയിട്ടുണ്ട്. മുഖ്യമന്ത്രി മഹിളാ സമ്മാൻ യോജനയുടെ കീഴിൽ 18 വയസു പൂർത്തിയായ സ്ത്രീകൾക്ക് എല്ലാമാസവും 1,000 രൂപ വീതം നൽകുമെന്നും ബജറ്റ് സമ്മേളനത്തിൽ ധനമന്ത്രി പ്രഖ്യാപിച്ചു. കൂടാതെ സ്ത്രീകളുടെ ക്ഷേമത്തിനും ശാക്തീകരണത്തിനും വേണ്ടി സർക്കാർ 2000 കോടി രൂപ അനുവദിക്കുമെന്നും അതിഷി അറിയിച്ചു.
ഡൽഹിയിലെ വോട്ടർമാരായ സ്ത്രീകൾ മാത്രമായിരിക്കും ഈ പദ്ധതിയിൽ ഉൾപ്പെടുക. കൂടാതെ സർക്കാരിന്‍റെ മറ്റേതെങ്കിലും ആനുകൂല്യങ്ങൾ കൈപ്പറ്റുന്നവരോ സർക്കാർ ജീവനക്കാരോ ഉയർന്ന വരുമാന പരിധി ഉള്ളവരാകാനോ പാടില്ല. ഡൽഹിയിലെ സ്ത്രീ വോട്ടർമാരുടെ എണ്ണം 67,30,371 ആണ്.
സാമൂഹ്യക്ഷേമ വകുപ്പ്, വനിതാ ശിശു വികസന വകുപ്പ്, എസ്‌സി,എസ്‌ടി,ഒബിസി ക്ഷേമ വകുപ്പ് എന്നിവയ്ക്ക് കീഴിലുള്ള വിവിധ പദ്ധതികൾക്കായി 6,216 കോടി രൂപയുടെ ബജറ്റ് വിഹിതവും ഡൽഹി മന്ത്രി പ്രഖ്യാപിച്ചു.
ആംആദ്‌മി സർക്കാറിന്‍റെ പത്താം ബജറ്റ് അവതരിപ്പിക്കാനായതിൽ അഭിമാനിക്കുന്നു. പത്താം ബജറ്റ് എന്നതിലുപരി ഡൽഹിയുടെ മാറ്റത്തിന്‍റെ ചിത്രമാണ് ഞാൻ അവതരിപ്പിച്ചത്. കെജ്‌രിവാൾ പ്രതീക്ഷയുടെ കിരണമാണ്. രാമരാജ്യത്തിൽ നിന്ന് പ്രചോദനം ഉൾക്കൊണ്ട്, രാമരാജ്യമെന്ന സ്വപ്‌നം സാക്ഷാത്കരിക്കാൻ ഞങ്ങൾ കഠിനമായി പരിശ്രമിക്കുകയാണെന്നും ധനമന്ത്രി അതിഷി കൂട്ടിച്ചേർത്തു.
