ശ്രീനഗർ: വടക്കൻ കശ്‌മീരിൽ എംഎൽഎയുടെ റാലിക്ക് നേരെ ആൾക്കൂട്ട ആക്രമണം. നിരവധി പേർക്ക് പരിക്കേറ്റു. ബന്ദിപ്പോര ജില്ലയിലെ തുലൈലിലെ ഗുജ്‌റാനിലാണ് സംഭവം. നാഷണൽ കോൺഫറൻസ് എംഎൽഎ നസീർ അഹമ്മദ് ഖാന്‍റെ റാലിക്ക് നേരെയാണ് ആക്രമണമുണ്ടായത്. നിരവധി വാഹനങ്ങൾക്ക് കേടുപാടുകൾ സംഭവിച്ചതായും പൊലീസ് പറഞ്ഞു.
ബിജെപി പ്രവർത്തകരാണ് തൻ്റെ റാലിയെ ലക്ഷ്യമിട്ട് ആക്രമണം അഴിച്ചുവിട്ടതെന്ന് ഗുരെസ് എംഎൽഎ നസീർ അഹമ്മദ് ഖാന്‍ ആരോപിച്ചു. തനിക്കെതിരെ തെരഞ്ഞെടുപ്പിൽ പരാജയപ്പെട്ട ബിജെപി നേതാവ് ഫക്കീർ മുഹമ്മദ് ഖാൻ്റെ പ്രവർത്തകരും ബന്ധുക്കളുമാണ് ഇതിന് പുറകിലെന്നാണ് ഗുരെസ് എംഎൽഎ പറയുന്നത്.
അതേസമയം, നാഷണൽ കോൺഫറൻസ് പ്രവർത്തകർ തങ്ങളെ പ്രകോപിപ്പിച്ചതായി ബിജെപി നേതാവ് ഫക്കീർ ഖാൻ്റെ മകൻ ഡിഡിസി തുലൈൽ അജാസ് അഹമ്മദ് ഖാൻ പ്രതികരിച്ചു. റാലിയിൽ ചില പ്രവർത്തകർ ബിജെപി പ്രവർത്തകരുടെ വീടുകൾക്ക് നേരെ കല്ലെറിഞ്ഞതും ആക്രമണം അഴിച്ച്‌ വിട്ടതുമാണ് സംഘർഷത്തിലേക്ക് നയിച്ചതെന്ന് തുലൈൽ അജാസ് പറഞ്ഞു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
സംഘർഷം ശക്തമായതോടെ പൊലീസ് എത്തിയാണ് സ്ഥിതിഗതികൾ നിയന്ത്രണ വിധേയമാക്കിയത്. ആക്രമണത്തിൽ പരിക്കേറ്റവരെ ചികിത്സക്കായി ആശുപത്രിയിൽ പ്രവേശിപ്പിച്ചിട്ടുണ്ട്. ഗുരുതര പരിക്കേറ്റ മൂന്ന് പേരെ ശ്രീനഗറിലെ ആശുപത്രിയിലേക്ക് റഫർ ചെയ്‌തു. പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ഇതുവരെ ആരെയും അറസ്‌റ്റ് ചെയ്‌തിട്ടില്ല.
Also Read:അഖ്‌നൂര്‍ ഏറ്റുമുട്ടല്‍: അതിര്‍ത്തി ജില്ലകളില്‍ സുരക്ഷ വര്‍ധിപ്പിച്ചു
