അംറേലി (ഗുജറാത്ത്): കളിച്ചുകൊണ്ടിരിക്കെ വീടിന് സമീപം നിര്‍ത്തിയിട്ട കാറിനുള്ളിൽ കുടുങ്ങിയ നാല് കുട്ടികൾ ശ്വാസം മുട്ടി മരിച്ചു. അംറേലി ജില്ലയിലെ രന്ധിയ പ്രദേശത്താണ് ദാരുണ സംഭവം ഉണ്ടായത്. രണ്ട് മുതല്‍ ഏഴ് വയസ് വരെ പ്രായമുളള കുട്ടികളാണ് മരിച്ചതെന്ന് പൊലീസ് അറിയിച്ചു.
മധ്യപ്രദേശിലെ ധാർ സ്വദേശികളായ കർഷകത്തൊഴിലാളി ദമ്പതികളുടെ നാല് മക്കളാണ് മരിച്ചത്. ദമ്പതികള്‍ക്ക് 7 മക്കളാണ് ഉണ്ടായിരുന്നത്. മക്കളെ വീട്ടിലിരുത്തി രാവിലെ ദമ്പതികള്‍ ജോലിക്ക് പോയി. തുടര്‍ന്ന് കളിക്കാന്‍ ഇറങ്ങിയ നാല് കുട്ടികള്‍ വീടിന് സമീപം പാർക്ക് ചെയ്‌തിരുന്ന ഫാം ഉടമയുടെ കാറിൽ കയറി ഡോര്‍ അടച്ചു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
അകത്ത് നിന്നും അടഞ്ഞ ഡോര്‍ കുട്ടികള്‍ക്ക് തുറക്കാന്‍ കഴിഞ്ഞിരുന്നില്ല. തുടര്‍ന്ന് മണിക്കൂറുകളോളം കാറിനുളളില്‍ അകപ്പെട്ട കുട്ടികള്‍ ശ്വാസം മുട്ടി മരിക്കുകയായിരുന്നു. വൈകിട്ട് മാതാപിതാക്കളും കാർ ഉടമയും തിരിച്ചെത്തിയപ്പോഴാണ് കുട്ടികളെ മരിച്ച നിലയില്‍ കാറിനുളളില്‍ കണ്ടെത്തിയത്.
അസ്വാഭാവിക മരണത്തിന് അംറേലി പൊലീസ് കേസ് രജിസ്റ്റർ ചെയ്‌തു. സംഭവത്തില്‍ കൂടുതല്‍ അന്വേഷണം നടന്നുവരികയാണ്.
