ഹൈദരാബാദ്: ജെ എസ് ഡബ്ല്യു എം ജി മോട്ടോര്‍ ഇന്‍ഡ്യ കമ്പനി തങ്ങളുടെ പ്രശസ്‌തമായ എം ജി ഹെക്‌ടര്‍ പ്ലസ് വിഭാഗത്തില്‍ പുതിയ രണ്ട് ഇനം കാറുകള്‍ കൂടി വിപണിയിലിറക്കി. ഈ കാറുകളുടെ എക്‌സ് ഷോറൂം വില 19.72 ലക്ഷം രൂപയിലാണ് തുടങ്ങുന്നത്. പെട്രോളിലും ഡീസലിലുമായാണ് ഈ രണ്ട് ഇനം കാറുകള്‍ ഇറങ്ങിയത്.
ഇവയില്‍ സെലക്റ്റ് പ്രോ പെട്രോള്‍ സിവിടി വേരിയന്‍റിന് 19.72 ലക്ഷം രൂപയാണ് എക്‌സ് ഷോറൂം വില. സ്‌മാര്‍ട്ട് പ്രോ ഡീസല്‍ എം ടി ഇനത്തിലുള്ള കാറിന് ഒരല്‍പ്പം കൂടി വില കൂടുതലാണ്. 20.65 ലക്ഷം രൂപയാണ് ഈ ഡീസല്‍ വേരിയന്‍റിന്‍റെ എക്‌സ് ഷോറൂം വില. ഏഴു പേര്‍ക്ക് ഇരിക്കാവുന്ന ഇരിപ്പിട സംവിധാനങ്ങളോടെയാണ് ഈ രണ്ടു മോഡലുകളും വിപണിയിലെത്തിയത്.
മറ്റ് ഫീച്ചറുകള്‍
എം ജി ഹെക്‌ടറിന്‍റെ ഈ പുതിയ വേരിയന്‍റുകളില്‍ നിരവധി പുതിയ ഫീച്ചറുകള്‍ ലഭ്യമാണ്. 14 ഇഞ്ച് ടച്ച് സ്ക്രീന്‍ ഇന്‍ഫോടെയ്ന്‍മെന്‍റ് സിസ്‌റ്റം ആണ് ഒന്നാമത്തേത്. ഐ സ്‌മാര്‍ട്ട് കണക്‌റ്റട് കാര്‍ ടെക്നോളജി, വയര്‍ലെസ് ആപ്പിള്‍ കാര്‍ പ്ലെയും ആന്‍ഡ്രോയ്‌ഡ് ഓട്ടോയും, വയര്‍ലെസ് ചാര്‍ജര്‍, എഞ്ചിന്‍ സ്‌റ്റാര്‍ട്ട് സ്‌റ്റോപ്പ് ബട്ടണ്‍, പവേര്‍ഡ് ഡ്രൈവര്‍ സീറ്റ് , ലെതര്‍ അപോള്‍സ്‌റ്ററി, ഡ്യൂയല്‍ ടോണ്‍ ഇന്‍റീരിയര്‍ തീം എന്നിവ ഈ കാറുകളില്‍ ലഭ്യമാണ്.
പുറംമോടി
എല്‍ഇഡി പ്രൊജക്റ്റര്‍ ഹെഡ് ലാംപുകള്‍, 18 ഇഞ്ച് മെഷീന്‍ഡ് അലോയ് വീലുകള്‍, എല്‍ ഇഡി ടെയ്ല്‍ ലൈറ്റുകള്‍, അതോടൊപ്പം ചേര്‍ന്ന് വരുന്ന എല്‍ ഇഡി ലൈറ്റ് ബാര്‍ എന്നിവയൊക്കെച്ചേര്‍ന്ന് ഈ പുതിയ ഇനങ്ങള്‍ കിടിലന്‍ ലുക്കിലാണ് എത്തുന്നത്. സെലക്റ്റ് പ്രോ പെട്രോള്‍ സിവിടി, സ്‌മാര്‍ട്ട് പ്രോ ഡീസല്‍ എം ടി എന്നീ രണ്ട് വേരിയന്‍റുകളിലും ഈ അത്യാകര്‍ഷകമായ എക്‌സ്‌റ്റീരിയര്‍ ലഭ്യമാണ്.
പവര്‍ എഞ്ചിനുകള്‍
എം ജി ഹെക്‌ടറിന്‍റെ സെലക്റ്റ് പ്രോ പെട്രോള്‍ സിവിടി യില്‍ 1.5 ലിറ്റർ ടര്‍ബോ ചാര്‍ജ്‌ഡ് പെട്രോള്‍ എഞ്ചിനാണ് ഉപയോഗിക്കുന്നത്. ഇത് 141 ബി എച്ച് പി പവര്‍ നല്‍കും.സ്‌മാര്‍ട്ട് പ്രോ ഡീസല്‍ എം ടി യില്‍ 2.0 ലിറ്റര്‍ ടര്‍ബോ ഡീസല്‍ എഞ്ചിനാണ് ഉപയോഗിക്കുന്നത്. ഈ എഞ്ചിന്‍ 168 ബി എച്ച് പി പവര്‍ പ്രദാനം ചെയ്യും.
