Raju Shetty: जूनच्या पहिल्या रविवारी नांगरट साहित्य संमेलन कोल्हापूरात होणार - माजी खासदार राजू शेट्टी

कोल्हापूर: शेतकऱ्यांच्या आजच्या प्रश्नावर साहित्यिक, कलावंत, विचारवंत, यांच्यामध्ये सखोल विचारमंथन व्हावे. शेतकरी चळवळीला यातून कालसंगत दिशा मिळावी यासाठी स्वाभिमानी शेतकरी संघटना आणि शिवार प्रतिष्ठान यांच्यावतीने, कोल्हापूरातील स्वामी विवेकानंद कॉलेच्या प्रांगणात पाहिल्या नांगरट साहित्य संमेलनाचे आयोजन करण्यात आले आहे. अशी माहिती स्वाभिमानी शेतकरी संघटनेचे नेते माजी खासदार राजू शेट्टी यांनी दिली. हे एक दिवशीय साहित्य संमेलन असून या संमेलनाला उत्सवी स्वरूप न देता शेतकऱ्यांच्या मूळ प्रश्नांवर चर्चा व्हावी. या चर्चेच्या माध्यमातून भविष्यकालीन शेतकऱ्यांच्या आंदोलनाची दिशा ठरावी. शेतकऱ्यांचे प्रश्न सुटण्यासाठी या संमेलनामध्ये ठोस उपाययोजना पुढे याव्यात. 

रविवारी नांगरट साहित्य संमेलन होणार: शेतकऱ्यांच्या मूळ प्रश्नावर साहित्यातून आसूड ओढण्यात यावा, बळीराजाला भेडसावणाऱ्या प्रश्नांना आतापर्यंत साहित्यामध्ये खूपच तोकडे स्थान मिळाले आहे. नांगरट सारख्या साहित्य संमेलनातून नवोदित लेखकांनाही शेतकऱ्यांचे प्रश्न समजावेत यासाठी या साहित्य संमेलनाचे आयोजन करण्यात आले आहे. दरवर्षी जूनच्या पहिल्या रविवारी नांगरट साहित्य संमेलन होणार असल्याची घोषणा स्वाभिमानी शेतकरी संघटनेचे नेते माजी खासदार राजू शेट्टी यांनी यावेळी केली.

जीवनगौरव पुरस्काराने संमेलनात सन्मानित:  संपूर्ण एकदिवशीय साहित्य संमेलनाचे स्वरूप पाहता शेतकरी हाच आमचा केंद्रबिंदू आहे. तो केंद्रबिंदू ठेवून जे पत्रकार ,विचारवंत, लेखक आणि चळवळीतील कार्यकर्ते काम करताय त्यांना स्वाभिमानी जीवनगौरव पुरस्काराने देखील या संमेलनात सन्मानित करण्यात येणार आहे. त्यांची निवड प्रक्रिया सुरू असून कुठलेही प्रस्ताव न मागवता विचार विनिमय करून लवकरच स्वाभिमानी जीवनगौरव पुरस्कार आम्ही जाहीर करणार आहोत. या संमेलनाच्या उद्घाटनाच्या सत्रात या पुरस्कारांचे देखील वितरण केले जाईल. अशी माहिती देखील  राजू शेट्टी यांनी पत्रकार परिषदेत दिली.