यवतमाळ - राजधानी दिल्लीत येत्या 26 जानेवारीला होणाऱ्या पथसंचलनात महाष्ट्रातील संतांचे दर्शन घडविणाऱ्या चित्ररथाचा समावेश आहे. विशेष म्हणजे चित्ररथावरील महाराष्ट्रातील संतांची शिल्पे ही यवतमाळच्या मातीत बनली आहेत. ही यवतमाळ जिल्हासाठीच नव्हे तर संपूर्ण महाराष्ट्रासाठी गौरवाची बाब आहे. दारव्हा तालुक्यातील अतिशय ग्रामीण भागात नखेगाव येथे राहत असलेल्या प्रवीण पिल्लारे, असे या शिल्पकाराचे आहे.
छंदातूनच शिल्पकलेचा जन्म
दरवर्षी येथील भव्यदिव्य पथसंचलनात वेगवेगळ्या प्रांताच्या चित्ररथ पथसंचलनात सहभागी होत असतात. यावर्षीच्या चित्ररथासाठी संतांचे शिल्प साकरण्यात आली आहेत. यामध्ये संत ज्ञानेश्वर, संत जनाबाई, संत तुकाराम, विठ्ठल, चोखामेळा, गोरोबा कुंभार आणि छत्रपती शिवाजी महाराजांचे स्वयंचलित दर्शन प्रजासत्ताकदिनी सर्व जगास घडवणार आहेत. शिल्प साकारणारा नवोदित कलावंत हा यवतमाळ जिल्ह्याच्या दारव्हा तालुक्यातील नखेगाव येथील प्रवीण पिल्लारे आहे. अगदी लहान वयापासूनच मातीशी खेळण्याचा छंद होता. त्यामूळे या छंदातूनच शिल्पकलेचा जन्म झाल्याचे तो सांगतो. .
एका महिन्यात 17 संतांची शिल्पे
महाराष्ट्र शासनाने पहिल्यांदा मुंबई-पुणे सोडून शिल्प साकारण्याची संधी यवतामळकरांना दिली. त्यामुळे यवतमाळसाठीच नव्हे तर संपूर्ण विदर्भासाठी ही अभिमानाची तसेच गौरवाची बाब आहे. विशेष म्हणजे अवघ्या महिन्याभराच्या कालावधीत प्रविण पिल्लारेने महाराष्ट्रतील 17 संतांची शिल्पे साकारली आहे. यामध्ये संत ज्ञानेश्वर, विठू माऊलीचे शिल्प जवळपास 9 फुटाचे तर अन्य शिल्पे आठ फुटांच्यावर आहेत.
35 कलाकार राबले रात्रंदिवस
राज्याच्या चित्ररथाचे संकल्पनाचित्र तसेच, त्रिमिती प्रतिकृती नागपूर येथील पथक शुभचे रोशन इंगोले आणि तुषार प्रधान या कलाकारांनी तयार केले आहेत. कला दिग्दर्शक नरेश चरडे आणि पंकज इंगळे यांच्या मार्गदर्शनाखाली यवतमाळ येथील मुख्य शिल्पकार प्रवीण पिल्लारे व प्रतिबिंब पथक, अमरावतीचे शिवा प्रजापती, विनय बगळेकर, भुषण हजारे, आकाश आंबडकर, शुमन मने यांच्यासह 35 कलाकार त्यासाठी राबत होते. त्यांना चलनयोग्य करण्याचे काम राजेंद्र टेंभरे व अंकुश टेंभरे यांनी केले आहे.
