यवतमाळ - तायडे नगर परिसरातील एक 42 वर्षांची व्यक्ती आरोग्याच्या समस्या असल्याने जिल्हा सामान्य रुग्णालयात भरती झाली. चार दिवसानीं प्रकृती सुधारल्याने त्याला डिस्चार्ज देण्यात आला. मात्र, यानंतर संबंधित व्यक्तीचा कोरोना रिपोर्ट पॉझिटिव्ह आल्याने रुग्णालयाचा भोंगळ कारभार चव्हाट्यावर आला आहे. मात्र रात्री उशिरा पुन्हा रुग्णाला शोधण्यात आले असून त्याचावर पुन्हा उपचार सुरू करण्यात आले आहेत.
अस्थमाचा त्रास होत असल्याने एक व्यक्ती 20 जुलैला जिल्हा सामान्य रुग्णालयात उपचारासाठी दाखल झाली. यावेळी त्यांचे स्वॅब घेण्यात आले. संबंधिताचा पहिला अहवाल निगेटिव्ह आला. त्यानंतर उपचार करण्यात आले; आणि बरे वाटत असल्याने 24 जुलै रोजी डिस्चार्ज देण्यात आला. मात्र 26 जुलै रोजी त्याचा दुसरा कोरोनाचा रिपोर्ट पॉझिटिव्ह आला. त्यामुळे चांगलीच खळबळ उडाली.
आता या प्रकरणात जिल्हा शल्य चिकित्सकांनी संबंधित रुग्ण विनापरवाना घरी गेल्याचे पत्र दिले असून त्याच्यावर पुन्हा उपचार सुरू करण्याचे आदेश दिले आहेत. तसेच तालुका आरोग्य अधिकाऱ्यास त्याचा अहवाल सादर करण्याच्या सूचना देण्यात आल्या आहेत.
एकंदरीत जिल्हा सामान्य रुग्णालयाच्या चुकीवर पांघरुण घालण्याचा हा प्रयत्न असल्याचे स्थानिक सांगत आहेत. संपूर्ण प्रकरण संबंधित रुग्णाच्या अंगावर टोलवण्याचा हा प्रयत्न सुरू आहे. रुग्णाच्या परिवाराने या प्रकरणातील जबाबदार डॉक्टरांवर कारवाई करण्याची मागणी केलीय.
