यवतमाळ - आमदार राजू तोडसाम यांच्या पत्नी प्रिया तोडसाम यांना १२ फेब्रुवारीला पांढरकवडा शहरातील वाय पॉईंटवर मारहाण करून विनयभंग करण्यात आला. याप्रकरणी पोलीस ठाण्यांमध्ये १० आरोपींविरुद्ध गुन्हा नोंदवण्यात आला आहे. मात्र, राजू तोडसाम यांच्या राजकीय वरदहस्तामुळेच आरोपीवर कुठलीच कारवाई करण्यात येत नसल्याचा आरोप, प्रिया तोडसाम यांनी केला आहे. आज (८ एप्रिल) झालेल्या पत्रकार परिषदेत त्या बोलत होत्या.
'आमदार राजू तोडसाम यांनी मला दोन वर्षा पूर्वी त्यांच्या पहिल्या पत्नीसोबत घटस्फोट झाल्याची माहिती दिली होती. मागील एक वर्षा पासून आम्ही दोघेजण आर्णी, पांढरकवडा, वर्धा, यवतमाळ शहरात, गावात सामाजिक जीवनात, सार्वजनिक कार्यक्रमात पती-पत्नी म्हणून वावरत होतो.
एका कार्यक्रमातून त्यांच्या सोबत वापस येत असताना वाय पॉईंट येथे अचानक आमच्या गाडीला समोरुन येवून एका गाडीने धडक दिली. काही कळायच्या आतच जवळपास २५ - ३० लोकांनी आमच्या गाडीवर हल्ला चढवला. मला गाडीतून बाहेर काढून मला बेदम मारहाण केली. माझा विनयभंग केला तसेच माझे दागिने हिसकावून घेतले. अश्लील भाषेत शिविगाळ कली. मी दिलेल्या तक्रारीनुसार पोलिसांनी २९ मार्चला आरोपी मनिष रामगिरवारसह १० लोकांवर विविध कलमानुसार गुन्हा दाखल केला. मात्र, एवढे गंभीर गुन्ह दाखल होऊनही पोलिसांनी आरोपींना अटक केलेली नाही'.
'हे सर्व आरोपी आमदार राजू तोडसाम यांच्या अत्यंत निकटवर्ती आहेत. त्यामुळे पोलीस राजकीय दडपणात आहे. राज्यात त्यांची सत्ता असल्यामुळे पोलीस आरोपींना अटक करण्यास धजावत नाही. त्यामुळे आरोपी मोकाट फिरत आहेत. त्यामुळे माझ्या जिवाला आणि अब्रूला धोका निर्माण झालेला आहे. त्यामुळे पोलिसांनी तातडीने आरोपींना अटक करावी आणि त्याच्यावर कडक कारवाई करुन त्यांना कारागृहात डांबावे', अशी मागणी प्रिया शिंदे यांनी पत्रकार परिषदमध्ये केली.
त्याचप्रमाणे आमदार राजू तोडसाम यांनी माझे आयुष्य बरबाद केले मला फसविले, असाही आरोप त्यांनी केला आहे.
