यवतमाळ - भरधाव ट्रकने मालवाहक जीपला जोरदार धडक दिल्याने जीपमालकाचा जागीच मृत्यू झाला. तर चालक जखमी झाला. ही घटना आज (गुरूवारी) पहाटे चार वाजता दरम्यान आर्णी मार्गावरील गुरुद्वारा जवळ घडली.
श्रीरंग पोतदार (रा. लातूर) असे मृत जीप मालकाचे नाव आहे. चालक मोतीनाथ सगर (रा. एकांबी, जि. लातूर) हा जखमी झाला. ते जीपमध्ये कोथिंबीर घेऊन लातूर येथून नागपूरकडे निघाले होते. भरधाव वेगात असलेल्या ट्रकने वाहनाला धडक दिली. यात चालकाच्या बाजूला बसून असलेले श्रीरंग पोतदार यांना गंभीर दुखापत झाली. मोठ्या प्रमाणात रक्तस्त्राव झाल्याने घटनास्थळीच मृत्यू झाला.
अवधूतवाडी पोलिसांनी घटनास्थळी धाव घेत तत्काळ जखमीला शासकीय रुग्णालयात उपचारासाठी दाखल केले. अपघातात जीपचे दोन लाख आणि 55 हजाराचे कोथिंबीर असे एकूण दोन लाख 55 हजार रुपयांचे नुकसान झाले. या प्रकरणी जीप चालक मोतीनाथ सगर याने अवधूतवाडी पोलीस ठाण्यात तक्रार दिली असून ट्रक चालक सुशील ठाकूर (रा. शिवणी, मध्यप्रदेश) याच्याविरुद्ध गुन्हा दाखल झाला आहे.
