यवतमाळ - जिल्ह्यात पावसाने जून आणि जुलै महिन्यातही दगा दिल्यामुळे साडेसात लाख हेक्टरवरील पिके धोक्यात आली आहेत. येत्या २-३ दिवसात पावसाने हजेरी लावली नाही तर बळीराजासमोर दुबार पेरणी करण्याचे संकट उभे राहणार आहे. यावर्षी रोहिणी नक्षत्रानंतर मृग नक्षत्रातही पावसाने दगा दिला. तर, आर्द्रा नक्षत्रामध्ये पावसाने हजेरी लावल्याने 82 टक्के पेरण्या पूर्णत्वास गेल्या आहे. आता शेतात कोवळे अंकुर दिसू लागले आहेत. मात्र त्याच्या वाढीसाठी दमदार पावसाची गरज आहे. त्यामुळे बळीराजा आता दमदार पावसाच्या प्रतीक्षेत आहे.
खरीप हंगामाची भिस्त असलेले दोन नक्षत्र कोरडे गेल्याने आधीच शेतकरी दुष्काळाच्या सावटात आहे. त्यामुळे तब्बल महिनाभर पेरण्या खोळंबल्या होत्या. मात्र, आर्द्रा नक्षत्राने दिलासा दिल्याने किमान पेरण्या पूर्णत्वास गेल्या आहे.
आतापर्यंत 15 जुलैपर्यंत 426.10 मिलीमीटर म्हणजे वार्षिक सरासरीच्या तुलनेत 37.80 टक्के पाऊस पडायला पाहिजे होता. मात्र, जिल्ह्यात 1 जून ते 15 जुलैपर्यंत सरासरी 127.7 मिलीमीटर पावसाची नोंद झाली आहे. झालेला पाऊस हा वार्षिक सरासरीच्या केवळ 13.94 टक्के इतकीच आहे. यावर्षी आता पावसाळ्याच्या 120 दिवसांपैकी 40 दिवसांचा कालावधी पूर्ण झाला आहे.
दमदार पाऊस न झाल्यामुळे जमिनीत खोलवर ओलावा पोहोचलेला नाही. त्यामुळे अंकुरलेल्या बियाण्यांची वाढ खुंटण्याची शक्यता बळावली आहे. म्हणून बळीराजा दमदार पावसाच्या प्रतीक्षेत आहे.
