यवतमाळ - जिल्ह्यात कोरोनाचा प्रकोप दिवसागणिक वाढत आहेत. याची साखळी तोडण्यासाठी प्रशासनाने यवतमाळसह पांढरकवडा, नेर पुसद, दिग्रस आणि दारव्हा लगतच्या काही भागात 31 जुलैपर्यंत संपूर्ण लॉकडाऊन घोषित केले आहेत. अत्यावश्यक बाबी वगळता सर्व व्यवहार सात दिवसासाठी पूर्णपणे बंद ठेवण्यात आले आहे.
यादरम्यान, केवळ दवाखाने आणि औषधांची दुकाने सुरू राहणार असून दूध विक्रेत्यांना काही तासांची सवलत देण्यात आली आहे. यादरम्यान भाजीबाजारही बंद राहील. पण फळ आणि भाजी फिरून विकण्यास सकाळी सात ते दहापर्यंत मुदत देण्यात आली आहे. स्वस्त धान्य दुकाने आणि कृषी केंद्र ही सकाळी 7 ते दुपारी 12 वाजेपर्यंत सुरू राहणार आहेत.
पेट्रोल पंप अत्यावश्यक सेवेसाठी सुरू राहतील. मात्र, केवळ ज्यांच्याकडे अत्यावश्यक सेवेतील पास आहेत, त्यांनाच पेट्रोल मिळणार आहे. त्याचबरोबर सर्वसामान्यांसाठी बँकेचे व्यवहार पूर्णपणे बंद राहणार आहेत. पोलिसांनी शहरातील चौकाचौकात बंदोबस्त लावला असून विनाकारण फिरणाऱ्या नागरिकांवर दंडात्मक कारवाईचे सत्र सुरू केले आहे.
हेही वाचा - मराठा आरक्षणप्रश्नी कौन्सिलरचा सर्व खर्च उचलण्याची तयारी; देवेंद्र फडणवीसांची ग्वाही
