यवतमाळ - केळापूर-आर्णी विधानसभा मतदारसंघाचे भाजप आमदार राजू तोडसाम काही दिवसांपूर्वी पत्नीच्या भांडणामुळे चर्चेत होते. त्यांच्या दोन पत्नींमध्ये भर कार्यक्रमात हाणामारी झाली होती. याप्रकरणी त्यांच्या दुसऱ्या पत्नीने (प्रिया) पहिल्या पत्नीविरोधात (अर्चना) तक्रार नोंदवली आहे. त्यात त्यांनी धिंड काढणे आणि विनयभंग यांसह अनेक गंभीर स्वरूपाचे आरोप केले आहेत.
राजू तोडसाम यांच्या पत्नी प्रिया तोडसाम यांनी मारहाण झाल्याप्रकरणी अपर पोलीस अधीक्षकांना निवेदन सादर केले आहे. यात त्यांनी आमदारांची पहिली पत्नी अर्चना येडमे-तोडसाम, पांढरकवडाच्या पंचायत समिती सदस्य शीला गेडाम, मनीष रामगीरवार, गणेश घोडाम, नागोराव गेडाम, अक्षय नवाडे, आकाश उर्फ मोनू कनाके, रुपेश चौधरी, महेंद्र कर्णेवार, रणजित चव्हाण यांच्याविरोधात कारवाईची मागणी केली आहे.
पांढरकवडा शहरात १२ फेब्रुवारी २०१९ रोजी रात्री १० वाजताच्या सुमारास काही लोकांनी आपल्यावर प्राणघातक हल्ला केला. एवढेच नाही तर लाथाबुक्क्यांनी तसेच चपलेने मारहाण केली आणि हा व्हिडीओ सर्वत्र व्हायरल केला. यावेळी आपल्या गळ्यातील व कानातील सोन्याचे दागिने आणि मोबाईल जबरीने हिसकावून आपला विनयभंग केला तसेच सार्वजनिकरीत्या धिंड काढली, असे आरोप प्रिया यांनी केले आहे. याप्रकरणी सर्व आरोपींना तत्काळ अटक करण्याची मागणी त्यांच्याकडून करण्यात आली आहे.
पंतप्रधान नरेंद्र मोदी यांची १६ फेब्रुवारीला पांढरकवडा येथे सभा असल्याने मी माझ्या पतीच्या सांगण्यावरून तक्रार करण्यास विलंब केला. शिवाय अर्चना यांनी माझ्या विरोधात अ‍ॅट्रॉसिटी अ‍ॅक्ट अंतर्गत गुन्हा दाखल करण्याची धमकी दिली असल्याचेही त्यांनी यावेळी सांगितले.
