वाशिम जिल्ह्यात चारित्र्याच्या संशयावरून पतींने कुऱ्हाडीने वार करून पत्नीची केली हत्या

चारित्राच्या संशयावरून पतीने पत्नीची कुऱ्हाडीने निर्घृण हत्या केल्याची धक्कादायक घटना उघडकीस आली आहे. मंगरुळपीर तालुक्यातील चोरद गावात रविवारी रात्री एक वाजताच्या सुमारास ही घटना घडली.

वाशिम - चारित्राच्या संशयावरून पतीने पत्नीची कुऱ्हाडीने निर्घृण हत्या केल्याची धक्कादायक घटना उघडकीस आली आहे. मंगरुळपीर तालुक्यातील चोरद गावात रविवारी रात्री एक वाजताच्या सुमारास ही घटना घडली. शोभा झाटे (वय 40 वर्ष) असे मृत महिलेचे नाव आहे. घटनेची माहिती मंगरुळपीर पोलिसांना मिळताच त्यांनी घटनास्थळी दाखल होऊन पंचनामा केला. तसेच आरोपी पती विठ्ठल झाटेला अटक केली असून पुढील तपास सुरू केला आहे.

अमर उर्फ सोनू विठ्ठल झाटे १९ रा. चोरद यांनी या घटनेची तक्रार दिली आहे. अमरचे वडील विठ्ठल किसन झाटे (वय ४५ रा. चोरद) याने पत्नी शोभा विठ्ठल झाटेची चारित्र्याच्या संशयावरून डोक्यावर व मानेवर लोखंडी कुऱ्हाडीने वार करून हत्या केली. तसेच फिर्यादीच्या दोन्ही खांद्यावर जीवे मारण्याचे उद्देशाने वार केले. या तक्रारीवरून पोलिसांनी आरोपी विठ्ठल किसन झाटेविरुद्ध गुन्हा दाखल केला. पीएसआय मंजुषा मोरे व चमूने घटनास्थळी भेट देऊन पाहणी केली आणि आरोपीला अटक केली. या प्रकरणाचा पुढील तपास पीएसआय मंजुषा मोरे करीत आहेत.