वाशिम - जिल्ह्यातील जऊळका येथील आत्महत्याग्रस्त शेतकरी दत्ता लांडगे यांच्या पत्नी सोनाली लांडगे यांना शासनाने नोकरी दिली होती. परंतू, ही नोकरी शासनाने हिसकावून घेतल्याने त्यांच्यावर उपासमारीची वेळ आली आहे. यासाठी सोनाली लांडगे यांनी मुख्यमंत्र्यांकडे इच्छा मरणाची मागणी केली असून, यासंदर्भात मुख्यमंत्र्यांना तहसीलदारामार्फत निवेदन दिले आहे.
सोनाली यांचे शेतकरी पती दत्ता आत्माराम लांडगे यांनी मुख्यमंत्र्यांच्या नावे पत्र लिहून 10 सप्टेंबर 2015 रोजी आत्महत्या केली होती. संबंधित पत्रात त्यांनी दुष्काळ व कर्जाला कंटाळून आत्महत्या केल्याचे म्हटले आहे. त्यानंतर मुख्यमंत्र्यांच्या आदेशाने सोनाली यांची वाशिम जिल्हाधिकाऱयांनी मदतनीस पदावर नेमणूक केली. दरमहा मिळणारे ७हजार रू मानधन हे त्यांच्या कुटुंबीयांसाठी उपजीविकेचे साधन होते.
परंतू, वाशिमच्या जिल्हाधिकाऱ्यांनी 11 जून 2018 रोजी त्यांना सेवेतून कमी केले. त्यामुळे लांडगे कुटुंबीयांवर उपासमारीची वेळ आली आहे. यानंतर त्यांनी जिल्हाधिकारी, पालकमंत्री, राज्यमंत्री डॉ रणजित पाटील तसेच आमदार अमित झनक यांच्याकडे निवेदन देऊन सेवेत सामावून घेण्यायाठी विनंती केली. मात्र, आजपर्यंत त्यांना सेवेत सामावून घेतले नाही.
यानंतर, सेवेत सामावून घ्या; अन्यथा इच्छा मरणाची परवानगी द्या, अशी मागणी सोनाली लांडगे यांनी निवेदनात केली आहे.
त्यांनी निवेदनाच्या प्रती राज्यपाल, विधानसभेचे विरोधी पक्षनेते विजय वडेट्टिवार, विधानपरिषदेचे विरोधी पक्ष नेते धनंजय मुंडे, शिवसेना पक्ष प्रमुख उध्दव ठाकरे, पंतप्रधान नरेंद्र मोदी यांना पाठवल्या आहेत.
