वाशिम : देशातील कोट्यवधी बंजारा समाजाचे तीर्थक्षेत्र समजल्या जाणाऱ्या पोहरादेवी (जि. वाशिम) येथे दरवर्षी राम नवमीला संत सेवालाल महाराज जन्मोत्सव यात्रा भरते. या यात्रेला देशभरातून बंजारा समाज बांधवांसह विविध समाजातील लाखो भाविक येतात. यंदा २१ एप्रिलला राम नवमी आहे. या दिवशी पोहरादेवी येथे यात्रा होणार होती. पण कोरोना विषाणू संसर्गाच्या पार्श्वभूमीवर ही यात्रा रद्द करण्यात आली आहे. पोहरादेवी तीर्थक्षेत्र येथील महंत, विश्वस्त आणि जिल्हा प्रशासन यांच्या ८ एप्रिलला जिल्हाधिकारी कार्यालयात संयुक्त बैठक झाली. या बैठकीत ही यात्र रद्द करण्याचा निर्णय घेण्यात आला. त्यामुळे सर्व भाविकांनी यावर्षी पोहरादेवी येथे न येता आपापल्याच घरी संत सेवालाल महाराज जन्मोत्सव साजरा करण्याचे आवाहन देवस्थानचे महंत, विश्वस्त यांनी केले आहे.
या सर्वांच्या बैठकीत झाला निर्णय
पोहरादेवी तीर्थक्षेत्राचे धर्मगुरू बाबूसिंग महाराज, महंत कबीरदास महाराज, महंत जितेंद्र महाराज व महंत सुनील महाराज यांची बैठक झाली. या बैठकीला जिल्हाधिकारी षण्मुगराजन एस., जिल्हा परिषदेच्या मुख्य कार्यकारी अधिकारी वसुमना पंत, जिल्हा पोलीस अधीक्षक वसंत परदेशी, निवासी उपजिल्हाधिकारी शैलेश हिंगे यांच्यासह अन्य अधिकारी उपस्थित होते. या बैठकीत ही यात्रा रद्द करण्याचा निर्णय घेण्यात आला.
घरीच संत सेवालाल महाराज जन्मोत्सव करा साजरा
पोहरादेवी यात्रेसाठी अनेक वर्षांपासून देशभरातून विविध समाजातील लाखो भाविक येतात. सध्या सर्वत्र कोरोनाचा संसर्ग मोठ्या प्रमाणात वाढला आहे. भाविकांचे आरोग्य सुरक्षित राहावे यासाठी पोहरादेवी यात्रा रद्द करण्याचा निर्णय पोहरादेवी देवस्थानचे महंत, विश्वस्त व जिल्हा प्रशासनाने घेतला आहे. तरी भाविकांनी यावर्षी राम नवमीला आपापल्या घरीच संत सेवालाल महाराज यांचा जन्मोत्सव साजरा करावा. तसेच कोरोनाचे हे संकट लवकरात लवकर नष्ट होण्यासाठी प्रार्थना करावी. गतवर्षीप्रमाणे यावर्षीही कोरोना संसर्गामुळे पोहरादेवी यात्रा रद्द करण्यात आल्याने कोणीही पोहरादेवी येथे येऊ नये. कोरोनाचा संसर्ग रोखण्यासाठी शासन, प्रशासनाकडून देण्यात आलेल्या सूचनांचे पालन करावे, असे आवाहन धर्मगुरू बाबूसिंग महाराज, महंत कबीरदास महाराज, महंत जितेंद्र व महंत सुनील महाराज यांनी यावेळी केले.
जिल्हाधिकाऱ्यांचे आवाहन
गतवर्षीच्या तुलनेत यंदा कोरोना संसर्ग वाढीचा वेग अधिक आहे. त्यामुळे सर्वांनी आवश्यक खबरदारी घेणे आवश्यक आहे. पोहरादेवी येथे दरवर्षी लाखो भाविक येतात. या भाविकांच्या आरोग्याच्या दृष्टीने यंदा यात्रा आयोजित करणे उचित होणार नाही. राज्यात सर्वत्रच कोरोना संसर्ग झपाट्याने वाढत आहे. त्यावर नियंत्रण मिळविण्यासाठी कडक निर्बंध लागू केले आहेत. त्यामुळे गतवर्षी पोहरादेवी तीर्थक्षेत्राचे सर्व विश्वस्त, महंत आणि भाविकांनी यात्रा रद्द करून ज्याप्रमाणे सहकार्य केले. त्याप्रमाणे यावर्षी २१ एप्रिल रोजी पोहरादेवी येथे होणारी यात्रा रद्द करून कोरोना संसर्ग रोखण्याच्या जिल्हा प्रशासनाच्या प्रयत्नांना सहकार्य करावे, असे आवाहन जिल्हाधिकारी षण्मुगराजन एस. यांनी देवस्थानचे महंत, विश्वस्त यांना केले.
पोलिस अधीक्षकांचे आवाहन
जिल्हा पोलीस अधीक्षक वसंत परदेशी यांनी सुध्दा यावेळी कोरोना विषाणूच्या संसर्गाचा धोका उपस्थितांच्या लक्षात आणून दिला. तसेच भाविक, सर्वसमान्य नागरिकांच्या आरोग्याचा विचार करून यावर्षीही यात्रा रद्द करण्याचा निर्णय घ्यावा, असे आवाहन त्यांनी केले. तसेच, निवासी उपजिल्हाधिकारी शैलेश हिंगे म्हणाले, पोहरादेवी येथील सर्व महंत, विश्वस्त यांनी गतवर्षी प्रशासनाला अतिशय चांगले सहकार्य केले. त्याचप्रमाणे यावर्षीय सर्वांनी सहकार्य करावे.
कोरोना लस घेण्याचे महंतांचे आवाहन
जिल्हा प्रशासनाने केलेल्या आवाहनाला प्रतिसाद देत पोहरादेवी तीर्थक्षेत्राचे धर्मगुरू बाबूसिंग महाराज, महंत कबीरदास महाराज, महंत जितेंद्र महाराज व महंत सुनील महाराज यांनी पोहरादेवी येथे २१ एप्रिल रोजी होणारी यात्रा रद्द करण्याच्या निर्णय घेतला. कोरोनाचे संकट रोखण्यासाठी जिल्हा प्रशासनामार्फत राबविण्यात येत असलेल्या सर्व उपाययोजनांना सर्व समाज बांधव सहकार्य करतील, असे आश्वासन त्यांनी यावेळी जिल्हा प्रशासनाला दिले. तसेच सर्व समाजबांधवांनी कोरोना प्रतिबंधक लस घेण्याचे आवाहनही त्यांनी केले.
हेही वाचा - वाझे प्रकरणात आपला काडीचा संबंध नाही : उपमुख्यमंत्री अजित पवार
हेही वाचा - आग लागल्यानंतर रुग्णवाहिकेचा स्फोट, औरंगाबादेतील घटना
