वर्ध्यात बचत गटांच्या 'वऱ्हाड महोत्सवा'ला सुरुवात

वर्ध्यामध्ये महिला बचत गटांचा 'वऱ्हाड महोत्सव 2020' आयोजित करण्यात आला आहे. 8 जानेवारी ते 11 जानेवारी दरम्यान शहरातील आरटीओ मैदानात हा महोत्सव सुरू राहील. यात वर्धा जिल्ह्यातील 55 आणि इतर सहा जिल्ह्यातून 126 महिला बचत गट सहभागी झाले आहेत.

वर्धा - बचत गटाच्या महिलांना कर्ज वाटप सर्वात सुरक्षित आहे. आत्ता पर्यंत या महिलांनी एकही कर्ज बुडवलेले नाही. बँकांनीही कर्ज वाटप करताना त्रुटी काढून अडवण्यापेक्षा विश्वासाने कर्ज द्यावे. कारण कर्ज घेऊन ते परत न करणे हे आमच्या भगिनींच्या संस्कारात नाही, असे मत जिल्हाधिकारी विवेक भीमनवार यांनी व्यक्त केले. ते वर्ध्याच्या वऱ्हाड महोत्सव 2020 च्या उदघाटन प्रसंगी बोलत होते.

या महोत्सवाच्या माध्यमातून बचत गटाच्या महिलांना वस्तू विक्रीसाठी व्यासपीठ मिळाले आहे. बचत गटाच्या महिलांनी तयात केलेल्या वस्तू या महोत्सवात विक्रीसाठी ठेवण्यात येणार आहे. यात वर्धा जिल्ह्यातील 55 आणि इतर सहा जिल्ह्यातून 126 महिला बचत गट सहभागी झाले आहेत. विविध 30 खाद्य पदार्थांची मेजवानीही वर्धेकरांना येथे अनुभवता येणार आहे. 8 जानेवारी ते 11 जानेवारी दरम्यान शहरातील आरटीओ मैदानात हा महोत्सव सुरू राहील. यावेळी बँकेच्या वतीने 112 बचत गटांना अर्थसाह्य स्वरूपात 112 कोटींचे कर्ज उपलब्ध करून देण्यात आले.

हेही वाचा - म्हादई अभयारण्यात ४ दिवसात ४ वाघांचे आढळले मृतदेह, ३ जण ताब्यात

महिलांनी वेळोवेळो आपण सक्षम असल्याचे दाखवून दिले आहे. त्यामुळे ग्रामीण भागातील महिलांना प्रोत्साहन देणे गरजेचे आहे. बचतगटाच्या महिलांनी तयार केलेल्या वस्तूंना आकर्षण पॅकिंग नसते. मात्र, ते नक्कीच भेसळमुक्त असतात. म्हणून जास्त प्रमाणात बचतगटांच्या उत्पादनांची खरेदी करावी, असे आवाहन नवनियुक्त जिल्हा परिषद अध्यक्षा सरिता गाखरे यांनी केले.

या कार्यक्रमाला जिल्हा परिषदेच्या अध्यक्षा सरिता गाखरे, उपाध्यक्ष वैशाली येरावर, जिल्हाधिकारी विवेक भीमनवार, पोलीस अधीक्षक बसवराज तेली, महिला बालकल्याण सभापती जयश्री गफाट, कृषी सभापती मुकेश भिसे, उमेद प्रकल्पाचे विभागीय आयुक्त, प्रकल्प संचालक विवेक इलमे हे उपस्थित होते.