वर्धा : पुलगावात दोन गावठी पिस्तुलासह अकरा जिवंत काडतुसे जप्त, दोघे अटकेत

देवळी तालुक्यातील पुलगाव येथे दोघांकडून दोन गावठी पिस्तूल, अकरा जिवंत काडतूस आणि एक धारदार चाकू जप्त करण्यात आला आहे. याप्रकरणी पुलगाव पोलीस ठाण्यात गुन्हा दाखल झाला असून त्यांची चौकशी सुरू आहे.

वर्धा - देवळी तालुक्यातील पुलगाव येथे विनापरवाना गावठी पिस्तूल बाळगणाऱ्या दोघांना पुलगाव पोलिसांनी अटक केली आहे. सोमवारी (दि. 19 ऑक्टोबर) दुपारी दुचाकीवरून येताना राम मंदिर परिसरात सापळा लावून कारवाई करण्यात आली आहे. यावेळी दोघांमकडून दोन गावठी पिस्तुलासह 11 जिवंत काडतुस आणि एक चाकू जप्त करण्यात आले आहे. हे दोघेही रेती व्यवस्याशी निगडित असल्याने बोलले जात आहे. गणेश रमेश येदबान (वय 43 वर्षे) आणि अविनाश गणेश खोडे (दोघे रा. पुलगाव, ता. देवळी) असे अशी दोघांची नावे आहेत.

आज (सोमवार) दुपारी दोघेही अमरावतीवरून येत असल्याची माहिती पुलागाव पोलिसांना मिळाली होती. यावेळी सापळा रचून राम मंदिर परिसरात (एमएच 40 यु 9638) दुचाकीने येणाऱ्या दोघांना अडवून विचारपूस करत झडती घेतली. यावेळी दोघांकडे दोन गावठी पिस्तूल, अकरा जिवंत काडतुसे आणि एक चाकू मिळाले. या प्रकरणी पोलिसांनी त्या दोघांना ताब्यात घेतले असून पुलगाव पोलीस ठाण्यात गुन्हा दाखल झाला आहे. त्यांच्याकडून पिस्तूल, काडतुसे, चाकू, दोन मोबाईल आणि दोन दुचाकी, असा मुद्देमाल पोलिसांनी जप्त केला आहे.

जप्त केलेले साहित्य

हेही वाचा - आम्हाला मोकळा श्वास पाहिजे... चिमुकल्यांचे महालक्ष्मी कंपनीच्या गेटसमोर आंदोलन