वर्धा - महाविकास आघाडी सरकारचे मुख्यमंत्री उद्धव ठाकरे सरकारतर्फे कर्जमुक्तीची घोषणा करण्यात आली होती. 24 फेब्रुवारीला प्राथमिक 68 ग्रामपंचायतमध्ये पहिली यादी जाहीर करत प्रायोगिक तत्त्वावर यादी जाहीर झाली. यात आलेल्या तांत्रिक अडचणी दूर करत आज दुसरी यादी जाहीर करण्यात आली. यामध्ये जिल्ह्यातील 61 हजार 84 शेतकरी लाभार्थी असणार आहे. पण, अद्यापही योजनेतील लाभासाठी महत्त्वाचा दुवा असणाऱ्या आधार अपडेट नसल्याने त्यांना अडचणींचा सामना करावा लागणार आहे. शिवाय यातील मृत व्यक्तींबाबत काय पाऊले उचलले जातील हे स्पष्ट नाही.
वर्धा जिल्ह्यातील पहिल्या यादीत 112 शेतकऱ्यांच्या खात्यात 1 कोटी 5 लाख रुपये जमा करण्यात आले आहेत. दुसऱ्या यादीत वर्धा जिल्ह्यातील 46 हजार 424 शेतकऱ्यांचा समावेश आहे. वर्धा जिल्हा प्रशासनाकडून आधार प्रमाणित करण्याची प्रक्रिया सुरू करण्यात आली आहे. वर्ध्यातील पहिल्या यादीत देवळी तालुक्यातील लोणी आणि कारंजा तालुक्यातील येणगाव या 2 गावांतील 166 शेतकऱ्यांचा समावेश होता. यापैकी 154 शेतकऱ्यांच्या खात्यात पैसे जमा करण्यात आल्याचे सांगितले जात आहे. उर्वरित 12 पैकी 8 शेतकऱ्यांचे आधार प्रमाणीकरण न झाल्याने तर चार शेतकरी मृत असल्याचे पुढे आल्याने सध्या लाभापासून वंचित आहेत. याबद्दल वरिष्ठ स्तरावर चर्चा सुरू असल्याचे उपनिबंधक गौतम वालदे यांनी सांगितले. यात 8 जणांचे आधार प्रमाणीकरण न झालेले शेतकरी आधार नंबर बँक अपलोड करेल किंवा कोण याबाबत चर्चा सुरू असल्याचे सांगितले जात आहे.
वर्धा जिल्ह्यात 61 हजार 84 लाभार्थी शेतकऱ्यां यापैकी 57 हजार 733 शेतकऱ्यांचे आधार अपडेट आहे. यात 2 यादी मिळून 14 हजार 458 शेतकरी बाकी असून यातील 3 हजार 351 शेतकऱ्यांची यादी अद्यापही बाकी आहे. हे वगळता 11 हजार 107 शेतकरी तिसऱ्या यादीच्या प्रतीक्षेत आहे.
या तीन हजार शेतकऱ्यांचा डेटा अपलोड केला असून दिसत नसल्याचे बँकेकडून सांगितले जात आहे. यात जिल्हाधिकाऱ्यांशी चर्चा करून सॉफ्ट डेटा मागवला आहे. हा डेटा सेंट्रल टीमला पाठवण्यात येणार आहे. गरज पडल्यास स्वतः घेऊन जाणार असल्याची तयारी उपनिबंधक गौतम वालदे यांनी पत्रकारांशी बोलतांना सांगितले.
हेही वाचा - पत्ता विचारण्याच्या बहाण्याने दुचाकीस्वाराने पळवली सोनसाखळी
