वर्धा - शहरातील रामनगर पोलिसांनी दुचाकी चोरट्याच्या मुसक्या आवळल्या असून त्याच्याकडून 12 दुचाकी जप्त करण्यात आल्या आहेत. दुचाकी चोरी करण्यासाठी असलेल्या 'मास्टर की' सह अंदाजे 7 लाखाचा मुद्देमाल जप्त करण्यात आला आहे. कोरोनामुळे अडचणीत असलेल्या दुचाकी धारकांना पोलिसांच्या करवाईने दिलासा मिळाला आहे. शेख नइम शेख युनूस, असे या चोरट्याचे नाव आहे. वर्धा शहर आणि रामनगर पोलीस स्टेशन अंतर्गत जानेवारी ते मार्च महिन्याच्या कालावधीत दुचाकी चोरीच्या घटना घडल्या होत्या.
चोरी गेलेल्या परिसरातील सीसीटीव्ही फुटेज तपासल्यानंतर एक संशयीत चेहरा समोर आला. हा चेहरा होता, शेख नईम शेख युनूसचा जो वर्ध्याच्या स्टेशन फैलात राहत असल्याचे समोर आले. त्यावर सतत पाळत ठेवून त्याचा मागोवा घेण्यात आला. अखेर त्याबद्दल सबळ पुरावे हाती लागताच, त्याला अटक करण्यात आली. त्यांच्यावर इतरही मालमत्ता चोरीचे गुन्हे शहर ठाण्यात दाखल असल्याचे समोर आले आहे. चौकशीदरम्यान पोलिसी खाक्या दाखवल्यावर त्याने 12 दुचाकी चोरल्याची कबुली पथकाला दिली. या दुचाकी चोरीत 11 गुन्हे दाखल आहे. यात 3 तीन दुचाकी चोरीचे गुन्हे शहर पोलीस ठाण्यात तर 8 दुचाकी चोरीचे गुन्हे रामनगर पोलीस ठाण्यात दाखल आहेत.
मास्टर कीच्या साह्याने चोरत होता दुचाकी - युनुस दुचाकीजवळ कुणी नसल्याची संधी साधून मास्टर कीच्या मदतीने दुचाकी घेऊन पसार होत. यानंतर संबधित दुचाकींची नंबर प्लेट बदलून त्या विकण्यासाठी तयार करत. पोलिसांना मिळालेल्या दुचाकींच्या नंबर प्लेट बदल्यामुळे गाडीचे चेचीस आणि इंजिन नंबरवरून गाडी मालकाचा शोध घेण्यात आला.
यवतमाळ जिल्ह्यातून केल्या दुचाकी जप्त - या प्रकरणांमध्ये जप्त केलेल्या दुचाकी या चोरट्याने यवतमाळ जिल्ह्यातील राळेगाव येथील गॅरेजवर ठेवले असल्याची माहिती पोलिसांना मिळाली. यासह अल्लीपूर पोलीस स्टेशन हद्दीतून काही दुचाकी जप्त करण्यात आल्या आहे
या प्रकरणाचा तपास उपविभागीय पोलीस अधिकारी पियुष जगताप यांच्या मार्गदर्शनात रामनगरचे पोलीस निरीक्षक धनाजी धडक यांच्या नेतृत्वात गुन्हे प्रगटीकरण पथकाने केला आहे. या पथकामध्ये राजू अकली, संतोष कुकडकर, निलेश करडे, संदीप खरात, राहुल दुधकोहळे यांचा समावेश आहे.
