मुंबईतून वर्ध्यात आलेली युवती कोरोना पॉझिटिव्ह, जिल्ह्यात रुग्णसंख्या 10 वर

जिल्ह्यात एकूण 11 कोरोनाबाधित रुग्णांची नोंद झाली आहे. यामध्ये वर्धा- 2, वाशिम-1, अमरावती -4, नवी मुबंई-3 आणि गोरखपूर (उत्तरप्रदेश)- 1 येथून परतलेल्या रुग्णांचा समावेश आहे. तर वर्धा येथील एका रुग्णाचा मृत्यू झाल्यामुळे सध्या 10 रुग्णांवर उपचार सुरू आहेत.

वर्धा- जिल्ह्यात शुक्रवारी आर्वी उपविभागा अंतर्गत नव्याने एक रुग्ण आढळून आला. यानंतर कोरोनाबाधितांची संख्या 9 वरून 10 झाली आहे. यात गृह विलगिकरणात असलेली ही मुलगी मुंबईच्या अंधेरी भागातून आली असल्याची माहिती मिळते आहे.

ही मुलगी मुंबईच्या अंधेरी परिसरात राहत असून एका खासगी कंपनीत काम करत होती. 14 मे रोजी या मुलीचा भाऊ तिला कारने वर्ध्याला घेऊन आला. यावेळी तिच्यासोबत कोंढाळी येथील मैत्रीण सोबत असल्याची चर्चा आहे. त्यांनतर संपूर्ण कुटुंबाला गृह विलगीकरणात ठेवण्यात आले होते. असे असले तरी काही प्रमाणात ही मुलगी किंवा अन्य कुटुंबीय बाहेर फिरले अशीदेखील माहिती मिळत आहे. तिची प्रकृती बिघडल्याने तिला रुग्णालयात दाखल करण्यात आले होते. तिचे अहवाल कोरोना पॉझिटिव्ह आल्याने खळबळ निर्माण झाली. तिच्या कुटुंबातील 4 जणांना आयसोलेशनमध्ये ठेवण्यात आले आहे.

जिल्ह्यात एकूण 11 कोरोनाबाधित रुग्णांची नोंद झाली आहे. यामध्ये वर्धा- 2, वाशिम-1, अमरावती -4, नवी मुबंई-3 आणि गोरखपूर (उत्तरप्रदेश)- 1 येथून परतलेल्या रुग्णांचा समावेश आहे. तर वर्धा येथील एका रुग्णाचा मृत्यु झाल्यामुळे सध्या 10 रुग्णांवर उपचार सुरू आहेत. वर्ध्याच्या सेवाग्राम प्रयोगशाळेत आजपर्यंत पाठविण्यात आलेल्या 1 हजार 63 नमुन्यापैकी 1 हजार 2 व्यक्तींचे नमुने निगेटिव्ह आले आहेत. तर 11 व्यक्तींचे कोरोना चाचणी अहवाल पॉझिटिव्ह आले आहेत. शुक्रवारी 103 व्यक्तींचे स्त्राव कोरोना चाचणीसाठी पाठविण्यात आले असून 50 अहवाल प्रलंबित आहेत. जिल्ह्यातील गृह विलगिकरणातील स्थिती -आतापर्यंत जिल्ह्यात 34 हजार 122 लोक गृहविलगीकरणामध्ये होते. त्यापैकी 23 हजार 782 व्यक्तींचा गृहविलगीकरण कालावधी संपलेला आहे. सद्यस्थितीत एकुण 10 हजार 340 व्यक्ती गृहविलगीकरणामध्ये आहेत. तसेच 106 व्यक्ती संस्थात्मक विलगीकरणामध्ये आहेत.आष्टी शहरात कंटेनमेंट झोन तयार -आष्टी शहरातील काही भाग प्रतिबंधित क्षेत्र (कंटेनमेंट झोन) म्हणून घोषित केला आहे. त्यानुसार आष्टी शहरातील वार्ड क्रमांक 3, 4, 5 आणि 10 हे प्रतीबंधीत क्षेत्र म्हणून घोषित करण्यात आले. तसेच बफर झोन मध्ये, वार्ड क्रमांक 6, 8, 11 व 12 तसेच पेठ अहमदपूर भाग नवीन आष्टी वार्ड क्रमांक 2 व 9 हा भाग बफर झोन म्हणून घोषित करण्यात आला आहे. या भागात जाणारे व येणारे सर्व रस्ते बंद करण्यात आले आहे. सदर भागातील नागरिकांना अत्यावश्यक (वैद्यकीय) कामाशिवाय इतर बाबीसाठी बाहेर जाण्यास प्रतिबंध करण्यात आला आहे.