वर्धा - महात्मा गांधीजींना १५० व्या जयंतीनिमित्त वेगवेगळ्या उपक्रमांतून आदरांजली वाहण्यात येत आहे. अशातच जालना येथील पेशाने वकिल असलेले राजेश ढवळे यांनी ३५० किलोमीटर अंतराची पायदळ दौड करत गांधीजींना आदरांजली वाहिली. ढवळे यांनी ही दौड ८ दिवसांमध्ये पूर्ण करत आज (बुधवार) सेवाग्राम गाठले.
गांधी जयंतीच्या निमित्ताने कुणी सूतकताई करून, कुणी स्वच्छता अभियान राबवून तर कुणी उपवास करून गांधीजींना आदरांजली वाहत आहेत. पण जालना येथील वकील राजेश ढवळे यांनी तब्बल ३५० किलोमीटर अंतर पायदळ दौड करत पूर्ण केली.
जालना येथून ढवळे यांनी २५ सप्टेंबर या तारखेला गांधी दौड सुरू केली होती. ते आज ३५० किलोमीटर अंतर पार करुन वर्ध्यात पोहोचले. हे अंतर पार करायला त्यांना ८ दिवसांचा कालावधी लागला. रोज साधरण ५० किलोमीटर अंतर पार करत आज सेवाग्राम पावन भूमीत पोहचले.
ढवळे यांना गावागावातील सामाजिक संघटना, कार्यकर्त्यांनी मुक्कामाची व्यवस्था करुन दिली. या प्रवासादरम्यान, लागलेल्या गावांमध्ये त्यांनी गांधीजींच्या विचारांचा जागर केला. सेवाग्रामला पोहोचल्यानंतर सेवाग्राम आश्रम, नई तालीम समितीच्या वतीने अॅड. ढवळे यांचे स्वागत करण्यात आले. यावेळी त्यांनी गांधीजींच्या एका यात्रेतून ही कल्पना सुचल्याचे सांगितले.
हेही वाचा - महात्मा गांधींच्या 150 व्या जयंतीनिमित्त देशभरात 150 ठिकाणी गांधीवादी करणार उपवास
हेही वाचा - निम्न वर्धा प्रकल्पाच्या 31 गेट मधून पाण्याचा विसर्ग, नदीकाठच्या गावांना सतर्कतेचा इशारा
