कोरोनाबाधित भागातून वर्ध्यात येण्यास परवानगी नाहीच, पोर्टलवरुन फिटनेस प्रमाणपत्र बंधनकारक

राज्यात व देशातील विविध भागात जाण्यासाठी आता राज्यस्तरावरील http://covid19.mhpolice.in या पोर्टलवर ऑनलाइन अर्ज सादर करावा. यामध्ये स्वतःची वैयक्तिक माहिती, प्रवासाचे कारण, प्रवास कुठून कुठे करायचा आहे, वाहनाचा प्रकार, वाहन क्रमांक, प्रवासाच्या अंतिम ठिकाणाचा पत्ता इत्यादी माहिती भरायची आहे. फिटनेस प्रमाणपत्राशिवाय जिल्ह्यातून बाहेर किंवा जिल्ह्यात येण्यास परवानगी नाही.

वर्धा - एका जिल्ह्यातून / राज्यातून दुसऱ्या जिल्ह्यात, राज्यात जाण्यासाठी आता राज्यस्तरावर एकच पोर्टल तयार केले आहे. त्यामुळे नागरिकांनी वर्धा जिल्हयातून बाहेर जिल्ह्यात किंवा राज्यात जाण्यासाठी तसेच बाहेर जिल्ह्यातुन, राज्यातुन वर्धा जिल्ह्यामध्ये येण्यासाठी परवानगी घेणे आवश्यक आहे. नागरिकांनी http:/covid19.mhpolice.in या पोर्टलवर परवानगीसाठी ऑनलाइन अर्ज सादर करावा, असे आवाहन जिल्हाधिकारी विवेक भीमनवार यांनी केले आहे.

कोरोना संसर्गासाठी प्रतिबंधात्मक उपाययोजना म्हणून केंद्र शासनाने देशात लॉकडाऊन केले. तसेच सर्व प्रवासी वाहतूक व्यवस्था बंद केली. यामुळे अनेक नागरिक आहे त्याच ठिकाणी अडकून पडले. वर्धा जिल्ह्यातही इतर राज्यतील व जिल्ह्यातील कामगार, विद्यार्थी, पर्यटक अडकले आहेत. राज्य व केंद्र शासनाने नागरिकांना त्यांच्या जिल्ह्यात व राज्यात जाण्यासाठी परवानगी दिली आहे.

प्रवासाची परवानगी कशी घ्याल -

राज्यात व देशातील विविध भागात जाण्यासाठी आता राज्यस्तरावरील http://covid19.mhpolice.in या पोर्टलवर ऑनलाइन अर्ज सादर करावा. यामध्ये स्वतःची वैयक्तिक माहिती, प्रवासाचे कारण, प्रवास कुठून कुठे करायचा आहे, वाहनाचा प्रकार, वाहन क्रमांक, प्रवासाच्या अंतिम ठिकाणाचा पत्ता इत्यादी माहिती भरायची आहे. सोबत, आधारकार्ड, स्वतःचा फोटो, नोंदणीकृत डॉक्टरांचे इन्फ्लुएन्झा, सारी किंवा कोविड - 19 ची लक्षणे नाहीत, असे फिटनेस प्रमाणपत्र जोडायचे आहे. यामध्ये छायाचित्राचा आकार कमी करण्याची सुविधा उपलब्ध करण्यात आली आहे. अर्ज सादर केल्यावर एक टोकन क्रमांक देण्यात येतो. तसेच मोबाईल क्रमांकावर अर्जाच्या पुढील प्रक्रियेचा संदेश प्राप्त होतो. पोर्टलवर जाऊन सुद्धा ई-पासची सद्यस्थिती तपासता येते, तसेच ई-पास तयार झाल्यावर पोर्टलवरून डाउनलोड करता येते. फिटनेस प्रमाणपत्र बंधनकारक प्रवासाची ऑनलाइन परवानगी घेताना त्यामध्ये नोंदणीकृत डॉक्टरांचे फिटनेस प्रमाणपत्र जोडणे बंधनकारक आहे. 99 टक्के अर्ज हे प्रमाणपत्र न जोडल्यामुळे नाकारण्यात येत आहेत.

बाधित भागातून येण्यास परवानगी नाहीच -

वर्धा जिल्हा ग्रीन झोनमध्ये आहे. येणाऱ्या नागरिकांमुळे जिल्हा बाधित होण्याची शक्यता लक्षात घेता इतर जिल्हा, राज्याच्या कोरोना बाधित भागातून वर्धा जिल्ह्यात येण्यास परवानगी देण्यात येत नाही.

ऑफलाईन परवानगी कशासाठी -

वर्धेतील नागरिकांना राज्यात आंतर जिल्हा (लग्न, मृत्यू) इमर्जन्सी कारणासाठी, प्रवास करायचा असल्यास केवळ ऑफलाईन परवानगी देण्यात येत आहे. त्यासाठी उपजिल्हाधिकारी अर्चना मोरे यांची नोडल अधिकारी म्हणून नियुक्ती केली आहे. या कामाव्यतिरिक्त उर्वरित सर्व परवानग्या ह्या ऑनलाइन देण्यात येत आहेत. अधिक माहितीसाठी व इतर जिल्ह्यातील जिल्हाधिकारी कार्यालयांचे संपर्क क्रमांकासाठी नागरिकांनी कृपया (07152)- 243446, 232250, 242250, 252250, 240914 या क्रमांकावर सकाळी 8 ते रात्री 10 पर्यंत तसेच wardhardc@gmail.com यावर संपर्क करावा.

वर्धेतून राज्यातील इतर जिल्ह्यात जाणाऱ्या नागरिकांसाठी नोडल अधिकारी म्हणून निवासी उपजिल्हाधिकारी सुनील कोरडे, महाराष्ट्रातून बाहेर राज्यात जाण्यासाठी उपजिल्हाधिकारी नितीन पाटील, तर इतर जिल्हा, राज्यातून वर्धेत येणाऱ्या नागरिकांसाठी उपजिल्हाधिकारी प्रवीण महिरे यांची नोडल अधिकारी म्हणून नियुक्ती केली आहे. ई-सेवा पोर्टलवर आत्तापर्यंत एकूण 1 हजार 392 अर्ज प्राप्त झाले असून त्यापैकी 628 अर्ज नाकारण्यात आले. 1 हजार 392 जणांमध्ये वर्धेतून बाहेर जाणारे 721 तर वर्धा जिल्ह्यात येण्यासाठी 668 व्यक्तींनी परवानगी मागितली आहे. यापैकी केवळ 6 व्यक्तींना जाण्याची परवानगी देण्यात आली आहे. तसेच कोविड-19 या पोर्टलवर आत्तापर्यंत 3 हजार 129 अर्ज प्राप्त झाले आहेत. यापैकी 159 व्यक्तींना परवानगी देण्यात आली आहे. तर, 2 हजार 970 अर्जांना परवानगी नाकारण्यात आले आहे. यामध्ये प्रामुख्याने कोरोनाबाधित भागातून येणाऱ्या लोकांची परवानगी नाकारण्यात आली. तसेच मेडिकल प्रमाणपत्र व कागदपत्रे न जोडल्याचेही कारण आहेत.