वर्धा - नागपूर-तुळजापूर या महामार्गाचे काम उत्कृष्ट झाले आहे. मात्र कंत्राटदारांने या महामार्गावर झाडे लावले नाहीत, म्हणून त्यांचे बिल रोखण्यास सांगितले. जेव्हा बिल रोखण्यात आले तेव्हा 80 हजार खड्डे खोदण्यात आलेस, परंतु, आता त्यात एकही झाड लावण्यात आले नाही, त्यामुळे रस्त्याचे काम करणाऱ्या दिलीप बिल्डकॉनवर खासदार रामदास तडस यांनी लक्ष ठेवावे, अशा सूचना देत केंद्रीय रस्ते विकास मंत्री नितीन गडकरी यांनी डीबीएल कंपनीला चांगलेच धारेवर धरले. आपण कंत्राटदाराकडून पैसे घेत नाहीत, त्यामुळे जर तो झाडे लावत नसेल तर त्याची 'ठुकाई' करू, असा सज्जड इशाराही नितीन गडकरी यांनी दिला.
केंद्रीय मंत्री नितीन गडकरी यांच्या हस्ते नागपूर-हैदराबाद महामार्ग सातवर हिंगणघाट येथील नांदगाव चौकातील उड्डाणपुलाचे लोकार्पण पार पडले. या सोहळ्यावेळी बोलताना गडकरी यांनी महामार्गावर झाडे लावण्यास टाळाटाळ केल्यास कारवाईचा बडगा उगरण्याचा इशारा कंत्राटदारास दिला आहे. यावेळी वणा नदी खोलीकरण व सौंदर्यीकरणासाठी केंद्रीय मंत्री गडकरीनी प्रयत्न करण्याचे आश्वासन दिले, नागपूरच्या धर्तीवर नदीतूनही भविष्यकाळात वॉटर टॅक्सी सुरू करण्याच्या दृष्टीने त्यांनी योजना दिली. राष्ट्रीय महामार्गावर झाडे लावून महामार्ग हिरवा करण्याचा सल्ला राष्ट्रीय महामार्ग प्राधिकरणाच्या अधिकाऱ्यांना दिला आहे.
झाडे न लावल्यास ठोकून काढू - नितीन गडकरी पुढे बोलताना गडकरी म्हणाले की, शेतकऱ्यांना समृद्ध करण्यासाठी शेतकऱ्यांचा उत्पादीत शेतमाल निर्यात झाला पाहिजे. हिंगणघाट शहरातील कृषी उत्पन्न बाजार समिती किंवा इतरांनी असा माल निर्यात करण्यासाठी प्रयत्न करावे त्यासाठी येथून रेल्वे वाहतूक व्यवस्था सुरू करण्यासाठी मदत करण्याचे आश्वासन गडकरी यांनी दिले. तसेच ऑक्सिजनची गरज पडू नये यासाठी अनेक ऑक्सिजन प्लांट उभे झाले. यामुळे तिसरी लाटही आली तरी ऑक्सिजन कमी पडणार नाही, अशी व्यवस्था निर्माण झाल्याचेही गडकरींनी यावेळी सांगितले.याप्रसंगी खासदार रामदास तडस, खासदार डॉ. विकास महात्मे, आमदार समीर कुणावर, डॉ.पंकज भोयर, दादारावजी केचे, डॉ.रामदास आंबटकर जिल्हा परिषद अध्यक्षा सरीता गाखरे, एपीएमसीचे समितीचे सभापती अॅड. सुधीर कोठारी, जिल्हाधिकारी प्रेरणा देशभ्रतार आदी मान्यवर उपस्थित होते.
