पुरात बैलगाडी अडकल्याने एका बैलासह गायीचा मृत्यू

नाला ओलांडून शेताकडे जाताना अचानक पाण्याचा प्रवाह वाढल्याने दोन जनावरे वाहून गेल्याची घटना वर्धा येथे घडली. प्रसंगावधान राखत सालगडी सुभाष जुगनाके याने पुराच्या प्रवाहात पोहून स्वत:चा जीव वाचवला.

वर्धा - गावालगतच्या नाल्यातून बैलगाडीने जात असताना अचानक पाण्याचा प्रवाह वाढल्याने दोन जनावरे वाहून गेल्याची घटना घडली. ही घटना समुद्रपूर तालुक्यातील विकणी (जसापूर) शिवारात घडली. प्रसंगावधान राखत सालगडी सुभाष जुगनाके याने पुराच्या प्रवाहात पोहून स्वत:चा जीव वाचवला. गावकाऱ्यांच्या मदतीने एका बैलाला वाचवण्यात जुगनाके यांना यश आले.

नव्याने जलयुक्त शिवारच्या माध्यमातून झालेल्या कामांमुळे नाल्याच्या पाण्याचा प्रवाह वाढला होता. रस्ता ओलांडून शेताकडे जाताना जुगनाके यांना पाण्याच्या अंदाज आला नाही. पाण्याचा प्रवाह अचानक वाढल्याने बैल बिथरले आणि गाडी पाण्याच्या प्रवाहात वाहत गेली. वाहून गेलेली जनावरे आणि बैलगाडी उमेश डोमाजी घवघवे या शेतकऱ्याची आहेत. सुभाष जुगनाके (वय ३६) हा सालगडी म्हणून कामावर आहे. या घटनेत शेतकऱ्याचे पन्नास हजार रुपयांचे नुकसान झाले आहे. घटनेची माहिती मिळताच तलाठी गजानन घरड, कृषी सहाय्यक देवकते यांनी पंचनामा केला आणि मदतीसाठी तरतूद करत असल्याची माहिती दिली.