वर्धा - निवडणुका येताच मताचा जोगवा मागत फिरताना वर्ध्यातील सिंदी (रेल्वे) येथील भाजपच्या नगरसेवकाचा व्हिडिओ व्हायरल झाला आहे. यात नगरसेवकाने महिला नगरसेविकेसमोरच नागरिकांना शिवीगाळ केली. समस्या सांगणाऱ्या सामान्य नागरिकांच्या समस्या ऐकून घेण्याऐवजी त्यांनाच अश्लील शिवीगाळ केल्याने नागरिक संतप्त झाले. यातील एकाने हा व्हिडिओ व्हायरल केल्याने नगर सेवकावर टीका होत आहे. प्रकाश मेंढे असे या नगरसेवकाचे नाव आहे.
सिंदी रेल्वे येथील प्रभाग सातमध्ये दोन नगरसेवक आहेत. यात भूमीगत गटार योजनेचे काम सुरू असल्याने याची पाहणी करण्यात आली. या कामाच्या दर्जाबाबत तक्रारी असल्याने नगरसेवक प्रकाश मेंढे, नगरसेविका अजया साखळे या कामाची पाहणी करण्यासाठी आले होते. यावेळी काही नागरिक तेथे पोहोचले. यावेळी नागरिकांनी कामामुळे होत असलेल्या समस्याच पाढा वाचला.
हेही वाचा - वर्ध्यात पाचशे रुपयांच्या वादातून युवकाची हत्या; अल्पवयीन मुलाला अटक, वडील फरार
काही प्रश्नांची उत्तर न देऊ शकल्याने प्रकाश मेंढे यांचा तोल सुटला. यावेळी महिला पदाधिकारीसोबत असल्याचेही भान न राखता त्यांनी अश्लील शिवागीळ करायला सुरुवात केली. यावेळी काही लोक संतप्त होऊन समोर जाऊन जाब विचारू लागले. तेव्हा मात्र नगरसेवकाचा पारा अजूनच चढला. शिवीगाळ करतानाचा हा व्हिडिओ सध्या सिंदी रेल्वे परिसरात मोठ्या प्रमाणात व्हायरल होत असल्याने नगरसेवकावर टीका होत आहे.
हेही वाचा - स्वीडनच्या ग्रेटाच्या आंदोलनाला सेवाग्रामच्या आनंद निकेतनचा हातभार
