ठाणे - बारमधून निघालेल्या तरुणाचा 8 ते 10 जणांच्या टोळक्याने तीक्ष्ण हत्याराने हल्ला करत खून केल्याची घटना घडली आहे. दीपक भोईर, असे हत्या झालेल्या तरुणाचे नाव आहे.
ही घटना उल्हासनगरच्या धुरू बारच्या शेजारी असलेल्या पटेल लो-प्राईज या दुकानासमोर घडली आहे. या घटनेचा थरार सीसीटीव्हीत कैद झाला आहे. दीपक भोईर असे निर्घृण हत्या झालेल्या तरुणाचे नाव असून तो माणेरे गावातील रहिवासी होता. एका बारबालेने तरुणाला मोबाईलवर संपर्क करून बारमध्ये बोलावले. मात्र, आदीपासूनच दबा धरून असलेल्या मारेकरांच्या तावडीत तो सापडला. त्यावेळी बारच्या आवारातच त्या तरुणाला गाठून त्याच्यावर ८ ते १० जणांच्या टोळक्याने तीक्ष्ण हत्याराने हल्ला करत निर्घृण हत्या केल्याची धक्कादायक घटना समोर आली आहे.
हेही वाचा - ठाण्यात संतप्त प्रियकराचा विवाहित प्रेयसीच्या आईवर तलवारीने हल्ला
याप्रकरणी उल्हासनगर पोलीस ठाण्यात ८ ते १० जणांच्या टोळक्याविरोधात हत्येचा गुन्हा दाखल करून पोलिसांनी तपास सुरू केला आहे. नरेश उर्फ बबल्या चव्हाण, असे मुख्य आरोपीचे नाव असून त्याचे ३ ते ४ साथीदार पोलिसांनी ताब्यात घेतले आहेत.
हेही वाचा - मुंब्रामध्ये #CAA आणि #NRC विरोधात ठिय्या आंदोलन
मृत दीपक भोईर याला मध्यरात्रीच्या सुमारास उल्हासनगरमधील वादग्रस्त असलेल्या धुरुबारमध्ये एका बारबालाने फोन करून भेटायला बोलावले होते. त्यावेळी बारमधून तिला भेटून आल्यांनतर बारच्या आवारात आरोपी नरेश उर्फ बबल्या चव्हाण व त्याच्या साथीदारासह हल्ल्याच्या तयारीत होता. दिपकला पाहताच हल्लेखोरांनी त्याच्या पाठलाग करून त्याच्यावर तीक्ष्ण हत्याराने जीवघेणा हल्ला केला. या हल्ल्यात दीपकच्या डोक्यावर, पाठीवर, हातावर गंभीर वार झाले. त्याला जवळच्या मध्यवर्ती शासकीय रुग्णालयात उपचारासाठी नेले असता त्याला डॉक्टरांनी मृत घोषित केले. ही हत्या पूर्ववैमनस्यातून झाल्याची माहिती दीपकच्या नातेवाईकांनी दिली.
दरम्यान, उल्हासनगरमध्ये रात्रभर राजरोसपणे सुरू असलेल्या ऑर्केस्ट्रा बारमुळे गुन्हेगारी वाढत असून, नेहरू चौकात सुरू असलेल्या धुरू बारचा या हत्येशी संबंध असल्याचे सूत्रांकडून माहिती पुढे येत आहे. तर रात्री उशिरापर्यंत सुरू असणाऱ्या धुरुबारच्या आवारातील हत्येची ही दुसरी घटना आहे. मात्र, या हत्येमुळे शहरात दहशतीचे वातावरण निर्माण झाले आहे. तर दुसरीकडे मृत दिपकच्या नातेवाईकांनी हत्या करणाऱ्या सर्वच आरोपींना पोलीस अटक करत नाहीत, तोपर्यंत दीपकचा मृतदेह ताब्यात घेणार नसल्याचे सांगितले.
हेही वाचा - ...'त्यापेक्षा उपमहापौर पदाचा राजीनामा दिलेला बरा'
