ठाणे - भिवंडी या यंत्रमाग उद्योग नगरीत बिहार राज्यातील मजूर कामगारांची संख्या मोठ्या प्रमाणावर आहे. त्यातच लॉकडाऊनमुळे येथील यंत्रमाग उद्योग ठप्प असल्यामुळे भिवंडी शहरात अडकून पडलेले बिहार राज्यातील स्थलांतरित मजूर कामगार हताश झाले होते. अशा १ हजार २०० कामगारांना घेऊन आज एक विशेष ट्रेन बिहारची राजधानी पाटणाच्या दिशेने रवाना झाली आहे.
शहरात अडकून पडलेले स्थलांतरित मजूर कामगार हे ४० दिवसांपासून काम नसल्याने व हाती पैसा नसल्यामुळे हवालदिल झाले होते. त्यांना आपल्या मूळ गावी जाण्याची ओढ लागली होती. परंतु, सार्वजनिक वाहतूक व्यवस्था बंद असल्यामुळे त्यांचा भ्रमनिरास झाला होता. दरम्यान, तिसऱ्या टप्प्यातील लॉकडाऊनमध्ये मुंबई महानगर प्रादेशिक प्राधिकरण क्षेत्रामधील भिवंडी रोड रेल्वे स्थानक या ठिकाणाहून परराज्यातील कामगारांना त्यांच्या गावी जाण्यासाठी विशेष ट्रेनची व्यवस्था करण्यात आली. रेल्वे प्रशासनाने राज्य शासनाच्या माध्यमातून ही व्यवस्था केली. या पार्श्वभूमीवर गोरखपूर उत्तर प्रदेश, जयपूर राजस्थान येथील दोन श्रमिक रेल्वे भिवंडीतून प्रवाशांना घेऊन रवाना झाल्या. त्यानंतर, आज दुपारी ४ वाजून ५ मिनिटांनी बिहार येथील पाटणा येथे जाण्यासाठी विशेष श्रमिक ट्रेन निघाली होती. या ट्रेनमध्ये १ हजार २०० प्रवाशी स्वार आहेत.
यावेळी पोलीस उपायुक्त राजकुमार शिंदे, उपविभागीय अधिकारी डॉक्टर मोहन नळदकर, तहसीलदार शशिकांत गायकवाड यांच्यासोबतच रेल्वे, पोलीस व महसूल विभागाचे अधिकारी यांनी या विशेष श्रमिक रेल्वेने प्रवास करणाऱ्या कामगारांना टाळ्या वाजून शुभेच्छा दिल्या आणि सर्वांना निरोप दिला. अडकून पडलेल्या कामगारांसाठी राज्य शासन, पोलीस, महसूल व रेल्वे यंत्रणांनी काटेकोर नियोजन केले होते. सर्व प्रवाशांना प्रवासादरम्यान दोन पॅकेट पुलाव, ३ पाण्याच्या बाटल्या, बिस्कीट, साबण, मास्क या साहित्याचे किट्स प्रशासनाच्या वतीने देण्यात आले, अशी माहिती उपविभागीय अधिकारी डॉ. मोहन नळदकर यांनी दिली.
दरम्यान, स्थलांतरित मजूर कामगारांकडून प्रवासाचे भाडे घेतल्या जाणार नाही, उलट प्रवास खर्चाचा ८५ टक्के भाग रेल्वे मंत्रालय व १५ टक्के भाग संबंधित राज्य उचलेल, असे केंद्र शासन व रेल्वे मंत्रालयातर्फे सांगण्यात आले आहे. असे असले तरीसुद्धा आज भिवंडी ते पटणा या विशेष श्रमिक ट्रेनमध्ये प्रवास करणाऱ्या कामगारांकडून प्रवास भाड्यापोटी ७२५ रुपये घेतल्याची माहिती प्रवासी कामगारांनी दिली आहे.
हेही वाचा- भिवंडीत केमिकलच्या गोडाऊनला आग, मोठे नुकसान
