ठाणे- सेलमध्ये १० रूपयाची साडी खरेदी करण्यासाठी आलेल्या महिलेची पर्स अज्ञात चोरट्यांनी लपास केली. पर्स बरोबर त्यामधील १० हजार रुपयेसुद्धा चोरीला गेले. पर्स चोरी गेलेल्या महिलेचे नाव प्रेरणा दिनेश भाटिया असे आहे.
उल्हासनगर मधील एका दुकानावर अवघ्या दहा रुपयांमध्ये साडी मिळत होती. साडी घेण्यासाठी येथे महिलांची प्रचंड गर्दी जमली. याच गर्दीचा फायदा घेत प्रेरणा यांची पर्स चोरट्यांनी लपास केली. या दुकानावर साडी खरेदी करण्यासाठी प्रेरणा आपल्या मैत्रिणीबरोबर सकाळी १० वाजल्यापासून रांगेत उभ्या होत्या. त्याच दरम्यान गर्दीचा फायदा घेत चोरट्याने त्यांची पैशांची पर्स चोरी केली.
या संदर्भात प्रेरणा यांनी उल्हासनगर पोलीस ठाण्यात तक्रार केली आहे. तक्रार केल्यानंतर पोलिसांनी अज्ञात चोरट्याविरुद्ध गुन्हा दाखल केला असून याप्रकरणी अधिक तपास सहायक पोलीस निरीक्षक बी. ए. दराडे करीत आहे.
१० रुपयात साडी मिळत असल्यामूळे उल्हासनगर मधील हे दुकान राज्यभर चर्चेत आले होते. साडी घेण्याकरिता आलेल्या महिलांच्या प्रचंड गर्दीमुळे येथे चेंगराचेंगरी होण्याचीही भीती व्यक्त केली जात होती. मात्र या घटनेमुळे दुकान मालकाने सेल बंद करण्याचा निर्णय घेतला आहे.
