ठाणे - एकीकडे मुस्लिम भगिनींच्या न्याय्य हक्कांसाठी तिहेरी तलाकबंदी विधेयकाच्या संमतीसाठी संसदेत प्रयत्न सुरू आहेत. तर दुसरीकडे भिवंडीत एका महिलेला हुंड्यासाठी चक्क व्हॉट्सअॅपवरुन तीन तलाक दिल्याची घटना समोर आली आहे. या प्रकरणी पीडित महिलेने पोलीस स्थानकात तसेच महिला मंडळात धाव घेतली आहे.
पीडित महिलेने पतीसह सासरच्या तीन जणांविरोधात पोलीस ठाण्यात गुन्हा दाखल करण्याची मागणी केली आहे .नदीम शेख असे व्हॉट्सअॅपवरून तलाक देणाऱ्या पतीचे नाव असून पाच वर्षांपूर्वी त्यांचे लग्न झाले होते. त्यांना एक मुलगादेखील आहे. पती नदीम शेख टेक्निकल इंजिनीअर म्हणून कल्याणमध्ये काम करतो, तर पीडित महिला ही पायाने अपंग असून घरकाम करते. अशा परिस्थितीत व्हॉट्सअॅप माध्यमातून ट्रिपल तलाक देण्यात आल्याने महिलेला धक्का बसला असून तिने पोलिस ठाण्यासह महिला मंडळात धाव घेतली आहे.
पीडित महिला आरजू शेख हिचा 18 मे 2014 रोजी नदीम याच्यासोबत मुस्लिम धार्मिक रितीप्रमाणे निकाह झाला होता. त्यावेळी हुंडा म्हणून आरजूच्या आई-वडिलांनी जावई नदीमला 10,051रु व संसारोपयोगी वस्तू भेट दिल्या. मात्र लग्नाच्या काही दिवसानंतर लगेचच नदीमने पीडित महिलेचा छळ करायला सुरुवात केली. तिला मारझोड करणे, शिवीगाळ करणे, चारित्र्यावर संशय घेणे असे प्रकार सुरू केले. सर्व त्रास सहन करुनही पीडितेने पाच वर्ष संसार टिकवून ठेवला. नदीम व आरजू यांना एक चार वर्षाचा गोंडस मुलगा आहे.
मागील काही महिन्यांपासून नदीमने फ्लॅट घेण्यासाठी 10 लाखांच्या हुंड्याची मागणी केली. मागणी पूर्ण न केल्याने पीडितेला बेदम मारहाण करून तिला घरातून बाहेर काढून देण्यात आलं. तसेच महिलेला व्हॉट्सअॅपवर ट्रिपल तलाक दिल्याचं सांगितलं गेलं. यानंतरही महिलेने पती नदीमला संपर्क करण्याचा प्रयत्न केला. परंतु त्याचा प्रतिसाद मिळाला नाही. अनेक दिवसांपासून पीडिता न्यायाची अपेक्षा करत पोलीस स्टेशन व महिला मंडळात धाव घेत आहे, मात्र अजूनही तिच्या तक्रारीची दखल घेण्यात आलेली नाही.
