ठाणे: जबरी घरफोडी करणाऱ्या तिघांना गोव्यातून अटक

ऑक्टोबर महिन्यात झालेल्या घरफोडी संदर्भात तीन आरोपींना अटक करण्यात आली आहे. त्यांच्याकडून २६ तोळे सोने, गुन्ह्यात वापरलेली गाडी असा ७ लाख ८० हजारांचा मुद्देमाल जप्त करण्यात आला.

ठाणे - खोपट परिसरात राहणाऱ्या करुणा संदीप ठाणगे यांच्या घरातील ३६ तोळे सोने अज्ञात चोरटयांनी लांबवले. ही घटना २३ ऑक्टोबरला घडली होती. याबाबत नौपाडा पोलिसांनी सीसीटीव्ही चित्रीकरणाच्या आधारे तीन आरोपींना अटक केली. त्यांच्याकडून २६ तोळे सोने, गुन्ह्यात वापरलेली गाडी असा ७ लाख ८० हजारांचा मुद्देमाल जप्त करण्यात आला आहे.

२३ ऑक्टोबरला चोरी झाल्यानंतर पोलिसांच्या हाती कुठलाच पुरावा नव्हता. पोलिसांनी फिर्यादी ठाणगे राहत असलेल्या परिसरातील सीसीटीव्हींची तपासणी केली. त्यातून पोलिसांना घरफोडी करणाऱ्या आरोपींची ओळख पटली. सीसीटीव्हीच्या चित्रीकरणात दिसणारे आरोपी बाबू जमालुद्दीन खान (रा. गोवंडी), संजय रत्ना कांबळे (रा. दिवा, ठाणे), दत्ताराम इंगळे (रा. गोवंडी) या तिघांना पोलिसांनी अटक केली.

हेही वाचा - माजी मुख्यमंत्री फडणवीसांविरोधात याचिका करणाऱ्याला न्यायालयाने ठोठावला 2 लाखांचा दंड

मोबाईल फोनच्या लोकेशनच्या आधारे तांत्रिक तपास करून ठाणे पोलिसांनी गोव्यातून या आरोपींना अटक केली. आरोपी बाबू खान आणि संजय कांबळे यांना ७ नोव्हेंबरला गोव्यातून अटक केली. त्यांनी दिलेल्या माहितीच्या आधारे दयाराम इंगळे याला ८ नोव्हेंबरला अटक करण्यात आली. अटक केलेल्या आरोपींनी गुन्ह्याची कबुली दिली आहे.