ठाणे : दुचाकीवरून आलेल्या झोमॅटो डिलिव्हरी बॉयचे टी-शर्ट आणि डोक्यात काळे हेल्मेट घालून भर रस्त्यातून बँकमधील कॅशीयरच्या हातातून ११ लाख ७५ हजारांची रोकड असलेली बॅग धूम स्टाईलने पळविणाऱ्या त्रिकुटाला बेड्या ठोकण्यात भिवंडी शहर पोलिसांना यश आले आहे. अरशद मोहम्मद इलियास मोह. मन्सुरी (वय २२ ), अब्दुल सईद अब्दुल वफा चौधरी (वय २४ ), सैफअली मोह. मुस्तफा खान, (वय २५ ) असे अटक केलेल्या आरोपींची नाव ( Three accused arrested in Thane ) आहेत.
11 लाख 75 हजारांची रोकड चोरण्याचा प्रयत्न - भिवंडीतील बेसीन कॅथोलिक को-ऑपरेटीव्ह बँकचे कॅशीयर रिजॉय जोसेफ फरेरा, व त्यांचे सुरक्षारक्षक हे दोघे एका दुचाकीवरून २९ ऑक्टोंबर रोजी दुपारी बँकेची ११ लाख ७५ हजाराची रोख रक्कम आय.डी.बी.आय. बॅक, कल्याण रोड शाखा येथे भरणा करणे करीता जात होते. त्याच सुमाराला भिवंडी - कल्याण रोडला लाईटच्या ट्रान्सफॉर्म जवळ, पंजाब नॅशनल बँकेचे समोरील रस्त्यावर त्यांची दुचाकी येताच, दुचाकीवरून झोमॅटोचे टी-शर्ट घातलेले व दुसऱ्या दुचाकी वरील दोघांनी काळे हल्मेट घातलेल्या दोन अज्ञात आरोपीने बँक कर्मचाऱ्याच्या दुचाकीला धडक दिली. त्यानंतर दुचाकीवरील पाठीमागे बसलेल्या झोमॅटो टी-शर्ट परिधान केलेल्या आरोपीने बँक कॅशीयरच्या हातातील बॅग खेचून कल्याणच्या दिशेने धूम स्टाईलने पळून गेले होते. याप्रकरणी बँक कॅशियरच्या तक्रारीवरून भिवंडी शहर पोलीस ठाण्यात अज्ञात चोरट्यांविरूद्ध गुन्हा दाखल करत तपास सुरु केला.
आरोपींना पकडण्यात यश - घटनेच्या दिवसापासून पोलीस पथकाने भिवंडी ते कल्याण मार्गावरील सी.सी.टी.व्ही. फुटेज तपासणी केली. त्यापैकी आरोपी हे भिवंडी – कल्याण मार्गावरील एका टेलरच्या दुकानात गेल्याचे समोर आले. त्यानंतर पोलीस पथकाने या लेटरकडे अधिक चौकशी केली असता, त्यामधून आरोपीचे नाव पोलिसांना समजले. त्यानंतर घटनास्थळ व अन्य ठिकाणचे मोबाईल डाटा (लोकेशन) घेवून तांत्रिक तपास सुरु केला. त्यावेळी आरोपींचे मोबाईल लोकेशन उत्तरप्रदेश मधील लखनऊमध्ये असल्याचे दाखवताच सपोनि पवार व तपास पथक ताबडतोब लखनऊला दाखल होऊन तेथील एस.टी.एफ. पथकाची मदत घेत, आरोपी अरशद मन्सुरी, अब्दुल सईद अब्दुल वफा चौधरी, यांना ताब्यात घेतले.
आरोपींनी दिली गुन्ह्याची कबुली - त्यांच्याकडे अधिक चौकशी केली असता दोघांनी गुन्हयाची कबुली दिली. तसेच त्यांच्याकडून गुन्हयातील ३ लाख रूपये रोख रक्कमसह गुन्हा करतांना एकमेकांशी संभाषण केलेले ३ मोबाईल हस्तगत केले. आरोपींचा उत्तरपदेश मध्येच ट्राझिट रिमांड घेवून आरोपींना भिवंडी येथे आणून दिनांक ९ नोव्हेंबर रोजी अटक करून न्यायालयात हजर केले असता १५ नोव्हेंबर पर्यत पोलीस कोठडी सुनावण्यात येऊन तिसऱ्या आरोपीचा शोध सुरु केला. गुन्ह्यात तिसरा आरोपी सैफअली मोह. मुस्तफा याचे मोबाईल लोकेशन उत्तरप्रदेशमध्ये दाखवत होते. त्यालाही पोलिसांनी ताब्यात घेऊन अटक करून त्याच्याकडून ३ लाखाची रोकड जप्त केली.
आरोपींनी आखला प्लॅन - गुन्ह्यातील मास्टरमाईंड अब्दुल सईद अब्दुल वफा चौधरी असल्याचे पोलीस तपासात समोर आले. गुन्हा करण्यापूर्वी आरोपी अब्दुल सईद हा भिवंडीतील आय.डी.बी.आय. बॅक गेला होता. त्यावेळी बेसीन कॅथोलिक को-ऑपरेटीव्ह बँकचे कर्मचारी या बँकेत रोज दुपारच्या सुमारास लाखोंचा भरणा करण्यासाठी दुचाकीवरून येत असल्याची माहिती मिळाली. या माहितीच्या आधारे त्याने इतर दोन आरोपीसोबत बॅकेच्या कॅशियरच्या हातातील बॅग हिसकावून पळण्याचा डाव रचला होता. त्यासाठी त्याने झोमॅटोचे २ टि-शर्ट,, दुचाकी व बॅगची जमवाजमव करून २९ ऑक्टोंबर ११ लाख ७५ हजाराची रोकड भरस्त्यातुन कॅशियरच्या हातातून पळवली होती. मात्र कपडे घेण्यासाठी टेलरकडे गेल्याने पोलिसांच्या तावडीत सापडले.
आरोपींकडून साहित्य जप्त - तिन्ही आरोपीकडून आतापर्यत गुन्हयातील ८ लाख रूपये व गुन्हा करतांना वापरलेले ३ मोबाईल किंमती ३३ हजार तसेच १ लाखची बजाज पल्सर कंपनीची दुचाकी , एक चाकू, आणि झोमॅटोचे २ टि-शर्ट व बॅग असा एकूण ९, लाख ३३, हजार रुपयांचा मुद्देमाल हस्तगत करण्यात आला आहे. तसेच गुन्ह्यातील इतर रक्कम आणि या आरोपीं आणखी काही गुन्हे केले आहेत का ? याचा तपास वरिष्ठ पोलीस निरीक्षक चेतन काकडे यांच्या मार्गदर्शनाखाली सपोनि पवार करीत आहेत.
