मीरा-भाईंदर (ठाणे) - मिरा-भाईंदर शहरातील पाणी टंचाईवर मात करण्यासाठी खासगी टँकरद्वारे पाणी पुरवठा करण्यासाठी नेमण्यात आलेल्या मे. श्रुती इंटरप्राईजेस या खासगी ठेकेदाराने निविदा करारनाम्यातील अटी-शर्तींचा भंग केल्यामुळे या कंपनीला काळ्या यादीत टाकवे, अशी मागणी सभागृह नेता प्रशांत दळवी यांनी आयुक्त डॉ. विजय राठोड यांच्याकडे केली आहे.
पाणी पुरवठा विभागामार्फत महापालिका हद्दीतील नागरीकांना आवश्यकतेनुसार टँकरद्वारे पाणी पुरवठा करण्याचे धोरण आखण्यात आले आहे. हे पाणी पुरवठा हा जलवाहिनी नसलेल्या इमारतींना तसेच जलवाहिन्यांच्या अंतिम टप्प्यातील कमी दाबाने पाणी पुरवठा होणाऱ्या इमारतींना व खासगी कार्यक्रमांना मागणी केल्यास महापालिकेमार्फत एक हजार रूपये प्रति फेरा इतका दर आकारून टँकरने पाणी पुरवठा करण्यात येते. तर झोपडपट्टी परिसरात प्रति टँकर पाचशे रुपये शुल्क आकारण्यात येतो. यासाठी वार्षिक अंदाजित खर्च दोन कोटी रुपये असून यासाठी आर्थिक व प्रशासकीय मान्यता देण्यात आली आहे. मे. श्रुती इंटरप्राईजेस कंपनीला या कामाची निविदा मंजूर करण्यात आलेली असून 585 रुपये या प्रति फेरा या दराने हे काम देण्यात आलेले आहे.
टाकीचा आतील भाग गंजल्याचा सभागृह नेत्याचा आरोप
मिरा-भाईंदर महानगरपालिका, पाणी पुरवठा विभाग आणि मे. श्रुती इंटरप्राईजेस यांच्यात झालेल्या करारनाम्यानुसार या कंपनीने पिण्याच्या पाण्याचा टँकर सुस्थितीत ठेवणे बंधनकारक आहे. टँकरच्या टाकीचा आतील भाग गंजलेला नसावा जेणेकरून टँकरमधील पिण्याचे पाणी आरोग्याच्या दृष्टीने अपायकारक होणार नाही. पण, ठेकेदाराकडून पुरवठा करण्यात येत असलेल्या टँकर्सच्या टाक्यांचा आतील भाग गंजलेला आहे. यामुळे या टँकरमधील पाणी नागरिकांच्या आरोग्याच्या दृष्टीकोनातून घातक ठरल्याचा आरोप सभागृह नेते प्रशांत दळवी यांनी केला आहे.
ठेकेदाराकडून नियमांचे उल्लंघन
मिरा-भाईंदर शहराला पाणी पुरवठा करताना टँकरच्या फेऱ्यांचा हिशोब निश्चित करण्यासाठी ठेकेदाराने स्वखर्चाने एक संगणक व संगणक चालक महानगरपालिकेस उपलब्ध करून देणे बंधनकारक असल्याचे या करारनाम्यात स्पष्टपणे नमूद आहे. पण, ठेकेदाराने या कराराचे उल्लंघन केलेले आहे. त्याचप्रमाणे टँकरमार्फत पाणी पुरवठा करताना टँकर्सचा काळा बाजार होत असल्याच्या तक्रारी लक्षात घेऊन प्रत्येक टँकरमध्ये जी.पी.एस. सुविधा बसविणे बंधनकारक करण्यात आलेले आहे. पण, याकडेही या ठेकेदाराने दुर्लक्ष केले असल्याचे आढळून येत आहे. इतकेच नव्हे तर पिण्याच्या पाण्याचे टँकर रस्त्यावर उतरविण्यापूर्वी त्यांचे रजिस्ट्रेशन (नोंदणी), रोड टॅक्स क्लिअरन्स, परमिट व इन्शुरन्स करणे गरजेचे आहे. पण, मे. श्रुती इंटरप्राईजेस कंपनीने या अटीशर्तींची आजपर्यंत पुर्तता केलेली नाही.
अटी पूर्ण न केल्यास काळ्या यादीत टाकण्याचे करारात नमूद
मिरा-भाईंदर महानगरपालिका आणि मे. श्रुती इंटरप्राईजेस यांच्यात झालेल्या करारनाम्यानुसार या अटीशर्तींचा भंग झाल्यास मे. श्रुती इंटरप्राईजेस कंपनीला काळ्या यादीत टाकण्यात येईल, असे स्पष्टपणे या करारनाम्यात नमूद करण्यात आलेले आहे. त्यामुळे या कंपनीला काळ्या यादीत टाकण्यात यावे, अशी मागणी दळवी यांनी केली आहे.
हेही वाचा - नराधम सावत्र बापाच्या कृत्याने मुंब्रा हादरले; सहा वर्षीय मुलीवर करत होता पाशवी बलात्कार
