Thane News: चित्रकार ऐवजी चोपदार अशी केली नोंद;वयोवृद्ध कलावंतांची मुख्यमंत्र्यांकडून न्यायाची अपेक्षा

ठाणे येथे एखादी सरकारी चूक ही कशा पद्धतीने सर्वसामान्यांना त्रास देऊ शकते याचा प्रत्यय एका कलावंताला आला आहे. राज्य शासनाकडून राज्यातील वृद्ध कलाकारांना दिल्या जाणाऱ्या पेन्शन योजनेत सरकारने त्यांची थट्टा केल्याचे समोर आले आहे.

ठाणे : कुलकर्णी हे चित्रकार असताना, पेन्शन देताना समाज कल्याण विभागाने त्यांची नोंद चक्क चोपदार अशी करून पेन्शन कपात केली असल्याचे, स्वतः कुलकर्णी यांनी सांगितले. याबाबत वारंवार पाठपुरावा करून उपकाराची भाषा करून अधिकारी वर्ग त्यांची अवहेलना करीत आहे. तेव्हा, मुख्यमंत्र्यांनी या ठाणेकर कलाकाराला न्याय देण्याची मागणी जोर धरीत आहे. या सरकारी चुकीमुळे ठाण्यातील ख्यातनाम वयोवृद्ध चित्रकार सदाशिव कुलकर्णी यांच्या शासन दरबारी फेऱ्या सुरु आहेत.

चित्रकार ऐवजी चोपदार अशी केली नोंद: राष्ट्रीय स्वयंसेवक संघाच्या मुशीत घडलेले ठाण्यातील वयोवृद्ध चित्रकार सदाशिव कुलकर्णी (६६) यांनी पेन्शनसाठी शासनाकडे चित्रकार म्हणून अर्ज केला होता. चित्रकार असल्याचे सिद्ध करणारी जवळपास शेकडो शिफारसपत्रे त्यांनी या अर्जासोबत जोडली होती. यात ठाणे शहरातील आमदार काही नामवंत संस्था आणि प्रसिद्ध कलाकारांच्या शिफारसपत्रांचा समावेश होता. या सर्व शिफारसपत्रांवर आणि अर्जात सदाशिव कुलकर्णी यांचा चित्रकार म्हणूनच उल्लेख होता. मध्यंतरी कोरोना काळात सर्वच ठप्प असल्याने बऱ्याच काळानंतर हा अर्ज मंजुर झाला. मात्र, ठाणे जिल्हाधिकारी कार्यालयातील समाज कल्याण विभागाने चुकीने त्यांची नोंद 'चित्रकार' ऐवजी 'चोपदार' अशी केली. शासनाच्या पेन्शन योजनेत चित्रकारांचा समावेश गट-अ मध्ये, तर चोपदाराचा समावेश गट-क मध्ये होतो. त्यामुळे कुलकर्णी यांना गट-क प्रमाणे ३,७०० रुपयांऐवजी २,२०० रुपये पेन्शन मिळत आहे. यामुळे कुलकर्णी यांचे मागील चार वर्षापासून आर्थिक नुकसान होत आहे.

वारंवार भेट देवून मिळतात नुसती आश्वासने दखल नाहीच: चोपदार ऐवजी चित्रकार असा उल्लेख करावा, यासाठी आतापर्यंत अनेक पत्रे ठाणे समाज कल्याण अधिकाऱ्यांना दिली. मात्र, या पत्राची साधी दखल घ्यायला इथले अधिकारी तयार नाहीत. मुख्यमंत्री कार्यालयातही निवेदन दिले आहे. परंतु, जेवढे मिळते तेवढे घ्या आणि गप्प बसा, अशी उर्मट भाषा अधिकारी करीत असल्याची खंत सदाशिव कुलकर्णी यांनी व्यक्त केली. तर आता तर कुलकर्णी यांना जिल्हाधिकारी कार्यालयातल्या अनेकांनी थट्टेचा विषय बनवला आहे. चोपदार ते चित्रकार करण्याचे काम लवकरच होईल, चोपदार पदवी बदलून देतो अशा प्रकारे त्यांची थट्टा देखील केली जाते. आता मुख्यमंत्री ठाण्याचे आहेत आता तरी हा प्रकार थांबून मला न्याय मिळेल अशी आशा त्यांनी बोलताना व्यक्त केली आहे.