ठाणे - मानाची महापौर वर्षा मॅरेथॉन स्पर्धा अवघ्या काही दिवसांवर येऊन ठेपली आहे. असे असताना, संपूर्ण शहरात तर खड्डे पडलेलेच आहेत यासोबत, मॅरेथॉन स्पर्धेच्या मार्गातही असंख्य खड्डे असल्याचे दिसून येत आहे. धक्कादायक बाब म्हणजे, महापौरांनी मॅरेथॉनच्या मार्गाची पाहणी केली. या पाहणीदरम्यान, रस्त्यावरिल खड्डे पाहून महापौर बाईंनी पालिका मुख्यालय गाठणे पसंत केले. त्यानंतर सूत्रानी दिलेल्या माहितीनूसार, महापौरांनी शहरासह मॅरेथॉन मार्गात पडलेल्या खड्ड्यासंदर्भात एक तातडीने बैठक घेतल्याचे समजते.
ठाणे महापालिकेच्या वतीने आयोजित करण्यात येत असलेली ३० वी 'ठाणे महापौर वर्षा मॅरेथॉन' यावर्षी १८ ऑगस्टला होणार आहे. यासाठी महापौर मीनाक्षी शिंदे यांनी, सभागृह नेते नरेश म्हस्के, स्थायी समिती सभापती राम रेपाळे, उपमहापौर रमाकांत मढवी आणि शहर अभियंते, पालिका अधिकारी यांच्यासह मॅरेथॉन मार्गाचा पाहणी दौरा केला. या दौऱयात त्यांना शहरातील रस्त्याची अवस्थेचा अंदाज आला. हा पाहणी दौरा पाचपाखाडी येथील गुरुकुल सोसायटी, हरि निवास सर्कल त्यानंतर, तीन पेट्रोल असा सुरु होता. तेव्हा आमदार संजय केळकर यांच्या कार्यालयाच्या बाहेरचे मोठ्या प्रमाणात खड्डे पडले असल्याचे, लोक प्रतिनिधीच्या लक्षात आले.
रस्त्यावरील खड्डे बघून सभागृह नेते नरेश म्हस्के यांनी अधिकाऱ्यांची चांगलीच कानउघडणी केली. अनेक ठिकाणी रस्त्यांची योग्य पद्धतीने कामे झाली नसल्याचेही त्यांनी यावेळी पालिका पदाधिकाऱ्यांच्या लक्षात आणून दिले. रस्त्याची अवस्था पाहून सगळ्यांनी हा दौरा अर्धवट टाकून टेम्बी नाक्यावरुन थेट महापालिका मुख्यालय गाठणे पसंत केले.
पालिका मुख्यालयात आल्यावर स्वतः महापौरांनी एक तातडीची बैठक घेतली असल्याची माहिती सुत्राने दिली. त्यानंतर स्पर्धेची माहिती देण्यासाठी घेतलेल्या पत्रकार परिषदेमध्ये त्यांनी सर्व अधिकाऱ्यांना वेळेत खड्डे बुजवण्याची सूचना दिल्या असल्याचे सांगितले.
मागील वर्षी पेक्षा यावर्षी रस्ते बऱ्यापैकी काँक्रीट झाले असून उर्वरित रस्त्यांची कामे सुरु असल्याचे महापौरांनी सांगितले. जे रस्ते महापालिकेच्या अंतर्गत येतात ते महापालिका दुरुस्त करणार आहेच. मात्र, इतर प्राधिकरणाच्या अंतर्गत जे रस्ते येतात त्यांना देखील खड्डे बुजवण्याच्या सूचना देण्यात आल्या असल्याचे महापौरांनी सांगितले.
खड्ड्यांवरुन महासभेतही गदारोळ होण्याची शक्यता -
या दौऱ्याला उपस्थित असलेले सभागृह नेते नरेश म्हस्के हे रस्त्यावरील खड्डे पाहून संतप्त झाले. त्यांनी थेट दूरध्वनी वरुनच पालिका अधिकाऱ्यांची चांगलीच कानउघडणी केली. रस्त्यांची कामे व्यवस्थित झाली नसल्याचे, त्यांनी पालिका अधिकाऱ्यांच्या निदर्शनास आणून दिले. ते या विषयावरुन महासभेत अधिकाऱ्यांना धारेवर धरण्याची शक्यता आहे.
