ठाणे : डोंबिवलीत रिक्षा चालकांची दादागिरी वाढली असून, वाढलेल्या प्रवाशी भाड्या संदर्भात जाब विचारणाऱ्या प्रवाशाला मुजोर रिक्षाचालकाने बेदम मारहाण केल्याची घटना घडली आहे. ही घटना डोंबीवली पूर्वेकडील इंदिरा चौकात घडली असून मारहाणीचा प्रकार सीसीटीव्हीत कैद झाला आहे. तर याप्रकरणी जखमी प्रवाशाने रामनगर पोलीस ठाण्यात त्या मुजोर रिक्षाचालकाविरोधात गुन्हा दाखल केला आहे. गणेश तांबे असे मारहाण झालेल्या प्रवाशाचे नाव आहे.
प्रवाशी भाड्यावरून वाद : डोंबिवली हे चाकरमान्यांचे शहर आहे. त्यामुळे येथे कायमच रेल्वे स्थानकावर उतरल्यानंतर चाकरमानी घरी जाण्यासाठी रिक्षांचा वापर करत असतात. त्यातच कल्याण पूर्व भागात राहणारे गणेश तांबे हे काल (सोमवारी) रात्री साडे अकरा वाजता कामकाज आटपून नेहमीप्रमाणे डोंबिवली पूर्वेकडील इंदिरा चौकात जाऊन टाटा पॉवर पर्यंत शेअर रिक्षेने जाण्याचे ठरविले. गणेश हे रिक्षापर्यंत गेल्यानंतर भाडे किती घेणार असा प्रश्न रिक्षा चालकाला त्यांनी विचारला. त्यावेळी रिक्षा चालकाने चाळीस रुपये भाडे वाढवून सांगितल्याने त्यांनी इतके भाडे होत नाही. असे सामंजस्य पणे त्यांनी रिक्षा चालकाला सांगण्याचा प्रयत्न केला.
प्रवाशाला बेदम मारहाण : मुजोर रिक्षाचालकाने वाद घातला आणि त्यांना शिवीगाळ करत लाथाबुक्याने मारहाण करण्यास सुरुवात केली. त्यावेळी काही रिक्षाचालक मध्यस्थी करत असतानाच, रिक्षाचालक एवढ्याच थांबला नाही तर त्याने रीक्षेतील लाकडी दांडके काढून गणेश यांना बेदम मारहाण केली. रिक्षाचालकाने केलेल्या मारहाणीत तांबे जखमी झाले असून त्यांच्यावर शास्त्रीनगर रुग्णालयात उपचार करून घरी सोडण्यात आले आहे.
रिक्षाचालकाचा शोध सुरू : रिक्षावाल्यांची ही वाढती दादागिरी पाहून डोंबिवलीतील सर्वच प्रवासी घाबरले असून रिक्षावाल्यांची दादागिरी वाढल्याची चर्चा शहरात रंगली आहे. दरम्यान, कल्याण डोंबिवलीतील रिक्षाचालकांवर वाहतूक पोलिस आणि आरटीओचे कोणतेही नियंत्रण नसल्याचे या घटनेमुळे पुन्हा एकदा स्पष्ट झाले आहे. यासंदर्भात रामनगर पोलीस ठाण्यात मारहाण करणाऱ्या अनोखळी रिक्षाचालकाविरोधात गुन्हा दाखल करण्यात आला. आता पोलीसांनी सीसीटीव्ही फुटेजच्या आधारे त्या रिक्षाचालकाचा शोधाला सुरूवात केली आहे.
हेही वाचा : Forts Unprotected : राज्यातील तीनशे किल्ल्यांची सुरक्षा रामभरोसे; राज्य सरकारनेच दिली कबुली
