भिवंडी पोलिसांनी आवळल्या अट्टल चोरट्यांच्या मुसक्या; लाखोंचा मुद्देमाल जप्त

लाखोंचे महागडे मोबाईल व रेडिमेड कपड्याची चोरी करणाऱ्या अट्टल त्रिकुट चोरट्यांच्या मुसक्या आवळ्यात भिवंडी शहर पोलिसांना यश आले. त्यांच्याकडून लाखोंचा मुद्देमाल हस्तगत करण्यात आला आहे.

ठाणे - लाखोंचे महागडे मोबाईल व रेडिमेड कपड्याची चोरी करणाऱ्या अट्टल त्रिकुट चोरट्यांच्या मुसक्या आवळ्यात भिवंडी शहर पोलिसांना यश आले. अमन सुलतान मोमीन (वय 19 वर्षे, रा. समजदनगर, भिवंडी), जैद अब्दुल खालीक अन्सारी (वय 23 वर्षे, रा. इस्लामपुरा, भिवंडी) आणि मायकल ( वय 19 वर्षे), असे अटक केलेल्या गुन्हेगारांची नावे असून त्यांच्याकडून आतापर्यंत एकूण 5 लाख 64 हजार रुपयांचा मुद्देमाल हस्तगत करण्यात आला आहे.

चोरटे नागरिकांचे मोबाईल हिसकावून काढायचे पळ

जगदीश हिराजी देसले (वय 32 वर्षे) हे कामानिमित्ताने 17 मार्च, 2021 रोजी भिवंडीतील अरिहंत सिटी येथे ताडाली जकात नाका मार्गे पाईपलाईन रोडने जात होते. त्यावेळी दुचाकीवरून आलेल्या दोघा चोरट्यांनी त्यांना लाकडी दांडक्याचा धाक दाखवून त्यांच्या खिशातून 10 हजार 600 रुपयांचा मोबाईल हिसकवून पळ काढला. त्यांनतर त्यांनी भिवंडी शहर पोलीस ठाण्यात त्या दोघा चोरट्यांविरोधात गुन्हा दाखल झाला होता. पोलीस याचा तपास करत असताना खबऱ्याच्या मदतीने मोबाईल चोरीच्या गुन्ह्यातील आरोपी अमन व त्याचा एक साथीदार असल्याची माहिती मिळाली. त्यानुसार त्यांचा शोध घेऊन आरोपी अमनला भिवंडीतून अटक केली.

आरोपीकडून चार लाख 70 हजार रुपयांचे मोबाईल हस्तगत

पोलिसांच्या तावडीत सापडलेल्या आरोपी अमनची अधिक चौकशी केली असता त्याने साथीदारासह मोबाईल हिसकावून पळ काढल्याची कबुली दिली. त्यांनतर त्याला पोलीस कोठडी सुनावली असता पोलिसांनी त्याच्याकडे अधिक चौकशी केली असता त्याने आतापर्यंत एकूण 36 मोबाईल लंपास केल्याची कबुली दिली . या मोबाईलची किमंत 4 लाख 70 हजार रूपये असून सर्व मोबाईल त्याच्याकडून हस्तगस्त करण्यात आले आहे. गुन्ह्यात वापरलेली दुचाकीही पोलिसांनी जप्त केली असून असा एकूण 5 लाख 10 हजार रूपये किमतीचा मुद्देमाल हस्तगत करण्यात आला आहे.

फ्लिपकार्ट कंपनीचे गोदाम फोडून कपडे चोरणारेही गजाआड

दुसऱ्या गुन्ह्यातील आरोपी जैद अब्दुल खालीक अन्सारी व मायकल याही चोरट्याचा शोध घेऊन त्यांना ताब्यात अधिक चौकशी केली असता फ्लिपकार्ट कंपनीच्या गोडावूनमधून त्यांनी लंपास केलेले शर्ट, पॅन्ट, शर्ट पिस, कोट, लॅपटॉप कवर, मोबाईल कवर, फेस शिल्ड, एलसीडी स्टॅन्ड, असा 54 हजार रूपये किमतीचा मुद्देमाल हस्तगत केला आहे. तसेच आणखी काही मुद्देमाल त्यांनी कोठून चोरला आहे का, याचा तपास पोलिसांनी सुरू केला. तर या गुन्ह्यातील दोन आरोपी अद्यापही फरार असून पोलिसांकडून त्यांचा शोध सुरू असल्याची माहिती वरिष्ठ पोलीस निरीक्षक सुभाष कोकाटे यांनी दिली आहे.

हेही वाचा - लोकल मोटरमनच्या सतर्कतेमुळे वाचला आत्महत्या करणाऱ्या वृद्धाचा जीव, घटना सीसीटीव्हीत कैद