ठाणे - डोंबिवली औद्योगिक विभागात उद्योजक आणि नागरिकांच्या सोईसाठी पेंढारकर कॉलेजच्या मागे एमआयडीसी पोस्ट ऑफिस आहे. या कार्यालयातून मोठ्या प्रमाणात आर्थिक व्यवहार होतात. मात्र, या पोस्ट ऑफिसच्या मागे कचऱ्याचे ढीग साठल्याने उंदीर, घुशी यांचा सुळसुळाट झाला आहे. परिणामी पोस्ट ऑफिसच्या आवारात भक्ष्याच्या शोधात असलेल्या सापांचा वावर वाढला आहे. हे साप पोस्ट ऑफिसचा आश्रय घेत असल्याने पोस्ट कार्यालयातील कर्मचाऱ्यांमध्ये भीतीचे वातावरण पसरले आहे.
पोस्ट ऑफिसच्या आवारात मोठे गवत, झाडी वाढलेली असून जुने सामान आणि कचराही पडलेला आहे. ऑफिसच्या बाजूच्या भूखंडावर व रस्त्याच्याकडेला कचऱ्याचे ढीग जमा झाले आहेत. आत्तापर्यंत टेबलाच्या खणात, टेबल, कपाटाच्या खाली साप आढळले आहेत. पोस्ट ऑफिसचे दरवाजे, खिडक्यांना असलेल्या पोकळीतून उंदीर, साप कार्यालयात येत असावेत, अशी शंका आहे.
हेही वाचा - सत्ता पदांमध्ये फेरबदल; आता काँग्रेसचा उपमुख्यमंत्री, राष्ट्रवादीकडे विधानसभा अध्यक्षपद?
कार्यालयातील कर्मचारी किंवा कार्यालयात येणाऱ्या नागरिकांपैकी कुणाला साप चावल्याची अनुचित घटना घडली, तर याची जबाबदारी कोणाची असा प्रश्न कर्मचारी वर्गाला पडला आहे. याच पोस्ट ऑफिसमध्ये भविष्यात पासपोर्ट कार्यालय होणार आहे. याबाबत वरिष्ठ अधिकाऱ्यांकडे वारंवार तक्रारी केल्या मात्र, कोणतीही उपयोजना करण्यात आली नाही. एका महिला बचत गटाच्या एजंटने, पोस्ट मास्तर नसल्याचे सांगून तक्रार कुणाकडे करणार असा प्रश्न केला आहे. सापांच्या प्रश्नाबाबत डोंबिवली वेलफेअर असोसिएशनतर्फे पोस्टाच्या वरिष्ठ अधिकाऱयांना विनंती करणार असल्याचे सामाजिक कार्यकर्ते राजू नलावडे यांनी सांगितले .
