ठाणे - रामाचा वनवास चौदा वर्ष होता. भारत देशाला स्वातंत्र्य मिळून 75 वर्ष झाले. ठाणे जिल्ह्यातील अनेक दिग्गज खासदार दिल्लीत गेले. अनेक सरकार स्थापन झाले. पण अद्यापही ठाणे जिल्ह्याला केंद्रात स्थान मिळाले नाही. पंतप्रधान नरेंद्र मोदी यांनी ठाणे जिल्ह्याचा हा मंत्रिपदाचा वनवास संपविला असून ओबीसी चेहऱ्याला माझ्या रूपाने केंद्रीय मंत्रिमंडळात स्थान दिले आहे, अशी प्रतिक्रिया पंचायतराज केंद्रीय मंत्री कपिल पाटील यांनी पत्रकार परिषदेत दिली.
यासाठी जन आशीर्वाद यात्रा -
भाजपाची जन आशीर्वाद यात्रा आज (मंगळवार) अलिबागपासून सुरू झाली. तत्पूर्वी केंद्रीय मंत्री कपिल पाटील यांनी पत्रकार परिषद घेतली. त्यावेळी त्यांनी आपली भूमिका स्पष्ट केली. ठाणे जिल्ह्याचा मंत्रिपदाचा असलेला वनवास पंतप्रधानांनी संपविला आहे. केंद्राच्या योजना ह्या सर्व सामान्य नागरिकांपर्यंत पोहचविण्यासाठी आणि जनतेचे आशीर्वाद घेणे, ही जन आशीर्वाद यात्रेची संकल्पना पंतप्रधान नरेंद्र मोदी यांनी मांडली आहे. त्यानुसार ही यात्रा सुरू करण्यात आली, असे पाटील यांनी यावेळी सांगितले.
भूमीपुत्रांवर आंदोलन करण्याची वेळ येणार नाही -
ठाण्यातील भूमीपुत्राला केंद्रात स्थान दिल्याने भूमीपुत्राचे प्रश्न माझ्याकडून सुटले जातील, जेणेकरून पुन्हा भूमीपुत्राला आंदोलन करण्याची वेळ येणार नाही. यासाठीच मोदी यांनी माझ्यावर विश्वास टाकून मला जबाबदारी दिली आहे आणि ती सार्थकी ठरवणार आहे, अशी प्रतिक्रिया यानिमित्ताने कपिल पाटील यांनी दिली आहे.
...तर राज्याला पंतप्रधान नक्की मदत करतील -
1500 कोटींची मदत केंद्राने दिली आहे. मुख्यमंत्री उद्धव ठाकरे यांनी आधी आम्ही मदत देतो कमी पडली तर केंद्राकडे मागू असे म्हटले होते. केंद्राकडे निधीची मागणी केल्यास पंतप्रधान नक्की मदत करतील यासाठी राज्यात कोणाचे सरकार आहे हे ते पाहणार नाहीत, अशी प्रतिक्रिया राज्याला केंद्राकडून मिळणाऱ्या मदतीबाबत विचारलेल्या प्रश्नावर उत्तर देताना पाटील यांनी दिली.
हेही वाचा - ...तर 90 टक्के पूर्ण झालेल्या कामाचं श्रेय शिवसेनेला मिळालं पाहिजे - भास्कर जाधवांचा गडकरींना टोला
