नवी मुंबई - अनेक महिन्यांपासून डोळ्यांत पाणी आणणाऱ्या आणि शंभरी गाठलेल्या कांद्याचे भाव घाऊक बाजारात ५० ते ५५ रुपयांवर घसरले आहेत. मुंबई कृषी उत्पन्न बाजार समितीत कांद्याची आवक गेल्या १५ दिवसांपेक्षा अधिक झाली आहे. मात्र, ग्राहकांच्या माध्यमातून जास्त कांदा खरेदी होत नसल्याने ही दर घसरण सुरू झाल्याचे व्यापाऱ्यांनी सांगितले आहे.
१५ दिवस अगोदर जुना कांदा १०० रुपये किलोने विकला गेला जात होता. त्यामुळे कांदा हा सामन्यांच्या आवाक्याबाहेर गेला होता. आता नवी मुंबईतील मुंबई कृषी उत्पन्न बाजार समितीमध्ये नवीन कांदा आणि जुना कांदा मिळून आज (शुक्रवारी) ११० गाड्या आल्या आहेत. यामुळे नवीन कांदा आल्याने १५ दिवस अगोदर जो जुना कांदा १०० रुपये किलोने विकला गेला सद्यस्थितीत तोच जुना कांदा हा ५०, ६० आणि ७० रुपये किलोने घाऊक बाजारात विकला जात आहे. याबरोबरच येत्या काही काळात कांद्याची आवक अधिक वाढली तर आणखी कांद्याचे दर खाली येतील, असे व्यापारी वर्गातून सांगण्यात येत आहे. यामधील काही प्रमाणातील कांदा गुजरात तसेच राज्यातील अहमदनगर, नाशिक आणि पुणे येथून आला आहे.
हेही वाचा - देवेंद्र फडणवीसांनी लपवले फौजदारी गुन्हे, नागपूर न्यायलयाने बजावली नोटीस
दुसरीकडे किरकोळ बाजारात कांद्याचे दर कमी होऊनही अजुनही कांदा महाग दरात विकला जात आहे. त्यात नवीन कांदा २० ते ४० रुपयांपर्यंत घाऊक बाजारात विक्रीला आहे. बाजारात पूर्वीच्या तुलनेने कांदा कमी येत आहे. मुळात कांदा महाग असल्याने किरकोळ विक्री करणारा जो व्यापारी १० किलो कांदा खरेदी करत होता तो सद्यस्थितीत फक्त ५ किलो कांदा खरेदी करत आहे. ग्राहक गरजेनुसार कांदा घेऊन जात असल्याने मालाला उचल मिळत नाही, त्यामुळे कांद्याचे भाव गडगडले आहेत. मालाची आवक बाजारात वाढली आहे. फेब्रुवारी महिन्यापर्यंत घाऊक बाजारात जुन्या कांद्याचा दर प्रतिकिलो २० रुपयांपर्यंत होईल असे, कांदा व्यापारी दिगंबर आव्हाळे यांनी सांगितले आहे. तसेच कांद्याचे दर स्थिर होण्यासाठी जवळपास एप्रिल महिना उगवेल असेही त्यांनी सांगितले आहे.
हेही वाचा - चालत्या बसमध्येच महिलेला कन्यारत्न; अन् लालपरी थेट पोहचली रुग्णालयात
