ठाणे - भारतीय चलनातील ५०० रुपयांच्या बनावट नोटा घेऊन आलेल्या एकाला गुन्हे शाखेच्या पथकाने ठाण्यात अटक केली आहे. तीनहात नाका परिसरात ५०० रुपयांच्या २ लाख ८३ हजाराच्या ५६६ नोटांसह काळुराम बुद्धा इंदवाळे (वय ४०) याला अटक केली. तर एकजण फरार झाला आहे.
ठाण्यात बनावट नोटा प्रकरणी एकाला अटक; एक फरार
ही माहिती गुन्हे शाखा युनिट-५ च्या पथकाला एका खबऱ्याने दिली. त्यानुसार पोलिसांनी आरटीओ कार्यालयाजवळ आणि हायवे हॉस्पिटलसमोर सापळा रचला. पोलिसांनी संशयित म्हणून पाठीवर काळ्या रंगाची सॅक असलेल्या इंदवाळे याला ताब्यात घेतले. तर त्याचा साथीदार कांती मोकाशे उर्फ कांतीलाल हा फरार होण्यात यशस्वी झाला. पोलीस पथकाने काळ्या सॅकची तपासणी केल्यानंतर त्यात २ लाख ८३ हजाराच्या ५०० च्या बनावट नोटा सापडल्या. गुन्हे शाखेचे पथक फरारी आरोपीचा शोध घेत आहे. गुन्हे शाखा युनिट-५ चे वरिष्ठ पोलीस निरीक्षक जयराज रणवरे यांच्या मार्गदर्शनाखाली अधिक या प्रकरणाचा अधिक तपास सुरू आहे.
