ठाणे - कोरोनाच्या विरोधात शासन आणि प्रशासन सगळ्यांनीच दंड थोपटले आहेत. ठाण्याच्या बसस्थानकात दिवसरात्र येथे प्रवाशांची वर्दळ सुरू असते. परंतु, कोरोना विरोधातील लढ्यात आता एस.टी. महामंडळ देखील राज्य शासनाच्या आदेशाचे पालन करताना दिसत आहे. त्यामुळेच एसटी प्रशासनाने बसची प्रवासी वाहतूक निम्म्यावर आणली आहे.
आज ठाण्यातील बसस्थानकात शुकशुकाट होता. स्थानक परिसरात तुरळक प्रवासीच येथे बघायला मिळाले. जे प्रवासी यात्रा करत होते, त्यांना प्रत्येकी एका सीटवर बसवून नेण्यात येत होते. तोंडावर मास्क लावलेले बसचे चालक आणि वाहक प्रवाशांना योग्य त्या सूचना देताना दिसत होते. घरी बसून काम करणे आपणही पसंत केले असते. पण, तशी सोय आपल्या व्यवसायात नसल्याने नाईलाजास्तव प्रवास करावा लागत असल्याची खंत काहींनी व्यक्त केली. 44 प्रवाशांची क्षमता असताना केवळ 21 प्रवाशांचीच वाहतूक करत असून सरकारी आदेशाचे तंतोतंत पालन करत असल्याची माहिती बस वाहकांनी दिली.
हेही वाचा - फिलिपाईन्समध्ये अडकले ३० भारतीय विद्यार्थी; नातेवाईकांनी शासनाला मागितली मदत
