ठाणे: जाणून घ्या ठाणे जिल्ह्यातील महत्वाच्या घडामोडी संक्षित स्वरुपात.
1) लंपी आजाराने घेतला ४१ जनावरांचा बळी; साथ आटोक्यात आल्याचा पशूसंवर्धन विभागाचा दावा
ठाणे: लंपी आजारामुळे गेल्या दीड महिन्याच्या कालावधीत ठाणे जिल्ह्यात ग्रामीण भागातील ४१ जनावरांचा बळी गेल्याचे समोर आले आहे. सध्याच्या घडीला २९० जनावरांवर उपचार सुरु असून यातील १७ जनावरांची प्रकृती गंभीर असल्याची माहिती जिल्हा पशुसंवर्धन विभागातर्फे देण्यात आली आहे. मात्र सद्यस्थितीत जिल्ह्यात लंपीच्या आजाराची साथ आटोक्यात असल्याची माहितीही जिल्हा पशुसंवर्धन विभागाकडून देण्यात आली आहे.
३८ गावांमध्ये लंपी आजाराचं प्रादुर्भाव: सप्टेंबर महिन्यात राज्यात जनावरांमध्ये लंपी आजाराची साथ पसरली होती. ठाणे जिल्ह्यातही भिवंडी, शहापूर, मुरबाड या तालुक्यातील जनावरांना देखील लंपीची लागण झाल्याची माहिती समोर आली होती. या आजाराचा प्रादुर्भाव रोखण्यासाठी जिल्हा प्रशासनातर्फे अनेक उपायोजना राबविण्यात आल्या होत्या. यामध्ये बाधित झालेल्या जनावरांच्या पाच किलोमीटर परिघातील सर्व जनावरांचे लसीकरण करण्यात आले होते. तसेच लागण झालेल्या जनावरांचे लसीकरण, उपचार खर्च देखिल शासकडून करण्यात येत आहे. जिल्ह्यात आतापर्यंत ३८ गावांमध्ये या आजाराचं प्रादुर्भाव पसरला होता.
जिल्ह्यात ५५१ बाधित जनावरांची नोंद: बहुतांश गावांतील जनावरांचे लसीकरण पूर्ण झाले आहे. तर उर्वरीत ठिकाणच्या जनावरांचे देखील लसीकरण करण्याचे काम जिल्हा पशुसंवर्धन विभागाकडून करण्यात येत आहे. जिल्ह्यात आतापर्यंत ६८ हजार ८७ जनावरांचे लसीकरण पूर्ण झाले आहे. तर आतापर्यंत जिल्ह्यात ५५१ बाधित जनावरांची नोंद झाली आहे. यामध्ये भिवंडी, बदलापूर तसेच शहापूर मधील जनावरांचा समावेश आहे.
१७ बाधित जनावरांची प्रकृती गंभीर: सद्यस्थितीत जिल्ह्यातील शासकीय पशुवैद्यकीय रुग्णलयांमध्ये तसेच पशुसंवर्धन विभागाच्या देखरेखीखाली २९० जनावरांवर उपचार सुरू आहेत. यामध्ये १७ बाधित जनावरांची प्रकृती गंभीर आहे. तसेच पाळीव जनावरांबरोबरच गोशाळेतील जनावरांचे देखील लसीकरण करण्यात येत आहे.
2) बेकायदा निमकोटेड युरिया खताची साठवणूक करणाऱ्यांचा पर्दाफाश; १६ लाखांच्या युरियाच्या गोणी जप्त
ठाणे: गोदामामध्ये बेकायदेशीर निमकोटेड युरियाची साठवणूक करून शासनाची व शेतकऱ्यांची फसवणूक करणाऱ्यांचा नारपोली पोलिसांनी पर्दाफाश केला आहे. या प्रकरणी नारपोली पोलीस ठाण्यात गुन्हा दाखल करण्यात आला आहे.
सूत्रांनी दिलेल्या माहितीनुसार, नारपोली पोलीस ठाण्याच्या हद्दीत लमिल कंपाउंडमध्ये महालक्ष्मी वेअर हाउस आहे. हे वेअर हाऊस प्रफुल्ल चंद्रकांत देशमुख (२९ रा.नवी मुंबई) यांच्या ताब्यात असून येथे अवैधपणे निमकोटेड युरियाची साठवणूक करून शासनाची व शेतकऱ्यांची फसवणूक केली जात असल्याची गुप्त बातमी नारपोली पोलिसांना मिळाली होती. अप्पर पोलीस आयुक्त पश्चिम प्रादेशिक विभाग ठाणे यांच्या मार्गदर्शनाखाली पोलिसांनी सदर ठिकाणी धाड टाकून खतांच्या गोण्या भरण्यासाठी आलेल्या ट्रक क्र.केए ५६-५४७२ मधून १७८६ निमकोटेड व संशयित साठवणूक केलेल्या एकूण १६ लाख ९६ हजार ७०० रुपये किमतीच्या युरियाच्या गोण्या जप्त केल्या आहेत.
3) पालिका आयुक्त बांगर यांच्या पवित्र्याने अधिकारी धास्तावले; मुख्यमंत्र्यांच्या मतदार संघात केली पहिली कारवाई
ठाणे: ठाणे पालिका आयुक्त पदी अभिजित बांगर यांनी कार्यभार सांभाळल्यानंतर कायद्याची कामं आणि शिस्तीची तलवार उपासल्याने पालिका कर्मचाऱ्यांची चांगलीच तारांबळ उडालेली आहे. पालिका कर्मचारी आणि अधिकारी यांना वेळेवर कामावर हजर राहणे, वेळेनंतरच मुख्यालयाच्या बाहेर पडणे असे आदेश त्यांनी दिले आहेत. तर ठाणे परिसरातील स्वच्छतेकडेही लक्ष केंद्रित केल्याने स्वच्छता विभागाचे कर्मचारी, अधिकारी ही कार्यरत झाले आहेत. तसेच पालिका कर्मचारी हे तीन दिवस उशीरा आल्यास एक दिवसाचा पगार कापला जाणार असल्याची माहिती दिल्याने आता कर्मचारी वर्ग आणि अधिकारी ही धास्तावलेले आहेत.
अभिजीत बांगर हे नवी मुंबई महानगरपालिकेचे आयुक्त असताना स्वच्छता अभियानांतर्गत नवी मुंबई महानगरपालिका महाराष्ट्रात प्रथम तर देशात तिसऱ्या क्रमांकावर आली होती. अशाच प्रकारे आता ठाण्यात देखील बांगर यांनी स्वच्छतेवरती मोठा भर दिला आहे त्यासाठी ते शहरात फिरून आढावा देखील घेत आहेत.
4) ठाण्यातून मोठ्या संख्येने महिला पदाधिकारी मातोश्री येथे मशाल घेऊन रवाना
ठाणे: शिवसेना उद्धव बाळासाहेब ठाकरे या गटाला मशाल हे चिन्ह मिळाल्यानंतर ठाण्यातून मोठ्या प्रमाणात महिला पदाधिकारी आज हातात मशाल घेऊन मातोश्री येथे जात आहेत. ठाण्यातील शक्ती स्थळ येथून शकडो महिला या मातोश्री येथे निघाले असताना उद्धव ठाकरे यांना पाठींबा दर्शवण्यासाठी जातं असल्याचे यावेळी महिला पदाधिकारी यांनी सांगितले. अंधेरी पोटनिवटणूकीत ऋतुजा लटके यांना आमचा पाठिंबा असून लटले यांच्या विरोधात असणाऱ्या उमेदवाराचे आम्ही डिपॉझिट जप्त करू, असा विश्वास यावेळी महिला जिल्हाप्रमुख अनिता बिर्जे यांनी व्यक्त केला.
5) अपघाताने एका डोळ्याने दृष्टिहीन झालेल्या व्यक्तीला दिली डॉक्टरांनी दृष्टी
ठाणे: अपघाताने डोळ्यात सळई गेल्याने डोळ्याला गंभीर इजा झालेल्या रुग्णाला पुन्हा दृष्टी देण्याचं काम ठाण्यातील नेत्र डॉक्टर गाडगिळ यांनी केले आहे. आपल्या कामाच्या ठिकाणी कंपनीमध्ये काम करत असताना तळपती सळई डोळ्यांमध्ये गेले असता या व्यक्तीला आपला डोळा गमवावा लागला. मात्र या व्यक्तीने डॉक्टर गाडगीळ यांच्याशी संपर्क साधून आपल्या उपचाराबाबत विनंती केली उपचारांमध्ये त्यांचा एक डोळा निकामी झाला असताना देखील नेत्रदानाच्या माध्यमातून निकामी झालेल्या डोळ्याला त्यांनी नवीन जीवनदान दिले.
