ठाणे - लॉकडाऊनच्या काळात सर्व कामगारांना माणुसकीच्या दृष्टीने सांभाळून घेण्याचे आवाहन मुख्यमंत्री उद्धव ठाकरे यांनी उद्योगपती आणि व्यावसायिकांना केले होते. टाटा, अंबानी सारख्या अनेक उद्योगपतींनी मदत करुन सामाजिक बांधिलकी जपली. मात्र, काही स्वार्थी व्यापाऱ्यांनी मराठी कामगारांना तडकाफडकी कामावरून काढण्यास सुरुवात केली आहे. अशा व्यापाऱ्यांविरोधात तकार करण्यासाठी हेल्पलाईन क्रमांक देण्याची, मागणी आमदार प्रताप सरनाईक यांनी केली. याबाबत सरनाईक यांनी मुख्यमंत्र्यांना एक निवेदन दिले आहे.
मुंबई आणि मराठी कामगारांच्या जिवावर काही व्यापाऱ्यांनी बलाढ्य साम्राज्य निर्माण केले आहे. मात्र, आता कोरोनाच्या कठीण काळात याच मराठी कामगारांना उद्योगपती आणि व्यापाऱ्यांनी वाऱ्यावर टाकले आहे. अशांना वेळीच अंकुश घालणे गरजेचे आहे. ओबेरॉय बिल्डरच्या बाबतीतही अनेक तक्रारी येत आहेत. असे अनेक बिल्डर आहेत जे कुठलीही पूर्व कल्पना न देता कामगारांना कामावरून काढून टाकत आहेत. त्यामुळे अनेक कामगारांना आर्थिक आणि मानसिक त्रास सहन करावा लागत आहे. नैराश्यातून भविष्यात आत्महत्येसारखी पावले उचलली जाऊ शकतात. त्यामुळे या कामगारांना वेळीच मदत करणे गरजेचे आहे, असे प्रताप सरनाईक यांनी निवेदनात म्हटले आहे.
लॉकडाऊनमुळे उद्योगांसह सर्वच क्षेत्रांचे जबरदस्त आर्थिक नुकसान झाले आहे. त्यामुळे त्यांच्यावरही आर्थिक दडपण आहेत. मात्र, कामगारांना कामावरून अशाप्रकारे काढून टाकणे हा त्यावरचा उपाय असू शकत नाही. आयुष्याची २०-२५ वर्षे एखाद्या कंपनीसाठी काम करणारा कामगारही कंपनीला होणारे आर्थिक नुकसान जाणून आहे. यावर मार्ग काढण्यासाठी मालक आणि कामगारांनी चर्चा करणे आवश्यक आहे, या मुद्द्याकडे प्रताप सरनाईक यांनी लक्ष वेधले आहे.
कामगारांना कामावरून काढणाऱया सर्व उद्योगपती, बिल्डर, मॉल मालक आणि व्यावसायिकांना मुख्यमंत्री योग्य ते निर्देश देतील याची खात्री असल्याचे प्रताप सरनाईक यांनी म्हटले. मात्र, त्यानंतरही मराठी माणसांना नोकरीवरून काढण्याचा आणि त्यांच्यावर अन्याय करण्याचा प्रयत्न झाला, तर त्यांची तक्रार करण्यासाठी शासनाच्यावतीने एक हेल्पलाईन नंबर उपलब्ध व्हावा. जेणे करून तक्रारदारांना आपली तक्रार देता येईल, अशी मागणी प्रताप सरनाईक यांनी केली आहे.
